Copa Libertadores: Brazil club-in ro an rel zel dawn?

South America club-te tana football inelna sang ber Copa Libertadores semifinal first leg-ah nimin zing khan Atletico Mineiro chuan River Plate chu 3-1 in an hneh. Semifinal hnuhnung zawk hi tukin dar 6:00-ah Brazilian club Botafogo leh Uruguayan club Penarol te an inkhel leh ang.

Arena MRV, Belo Horizonte-a inkhelah Brazilian club Mineiro an che ṭha a, Deyverson-a'n goal hnih khungin Paulinho-a'n goal khat a khung ve bawk. Second leg hi October 30, Nilaini hian Argentina khawpui Buenos Aires-ah an khel leh ang.

Nimin zing inkhelah mipui thawm a ṭha a, mipui 46,000 lenna Arena MRV a khat vek. Mineiro tan Deyverson a langsar a, kum 33 mi Brazilian forward hian minute 22-naah box chhungah rilru fim puin awlsam taka goalkeeper a bum hnuah goal hmahruai a khung.

Minute 70-naah Guilherme Arana ball pek ṭha chu Deyverson-a'n ṭha zetin goal kilah a pet a lut a, River Plate goalkeeper Franco Armani dem theih a ni lo. Minute 74-naah Deyverson hi a siamtuah a ṭang zui a, Brazilian forward ball pek chu Paulinho-a'n kawh zetin a pet goal. Paulinho hi Vasco da Gama leh Bayer Leverkusen tana khel tawh a ni.

South America Champions League hi tun hnaiah Brazilian club-in an thunun a, Copa Libertadores hnuhnung pangaah Brazilian club vek an champion. Tun ṭumah pawh hian team pali la dam zinga pahnih hi Brazilian club an ni a, Mineiro chiang taka an chak leh avangin Brazilian club bawk an champion nawn leh a rinawm hle.

Chutihrualin River Plate hi an mual Mâs Monumental Stadium-ah an tho chhuak leh thei a nih chuan, final-ah beiseina an sang tak an nei dawn. Kumin final hi Mâs Monumental Stadium-ah khelh tur a ni a, River Plate an tel lo a nih chuan khawtual mipui thin a ur khawp ang.