East Bengal an chak thei lo

Indian Super League match ruk an khelh tawhah East Bengal an la tlawm vek - Kolkata club hian Thawhlehni zan khan Odisha FC chu 2-1 in an ngam lo a, ISL table mawngphah an luah mek.

Odisha tan Roy Krishna chuan minute 22-naah goal hmahruai a khung a, Mizo forward Isak Vanlalruatfela siamsak a ni. Mahse, East Bengal an awm mai mai bik lo - first half hun pek belha Dimitrios Diamantakos-a penalty hmangin an chhanglet a, 1-1 in chawlhlawk hman a ni.

Kolkata club hian tun season-a a vawi khat nan ISL-ah point an hlawh chhuak ve dawn emaw an ti a, mahse, minute 69-naah Mourtada Fall chuan khung ve lehin, Odisha hi 2-1 in an chak daih.

Beisei anga season bul ṭan lo Odisha tan match nga an khelha vawi hnih an chakna ve chauh a ni a, vawi khat draw neiin, vawi hnih an tlawm tawh bawk.

Odisha khelmuala inkhelah mualneitu team tan Isaka bakah Jerry Lalrinzuala, K. Lalṭhathanga leh Jerry Mawihmingthanga ten inkhel bul an ṭan a, East Bengal lamah Lalchungnunga chu bench aṭangin a lut.

East Bengal hi tun season ISL ṭan dawna sum hmang na ber pawl an ni a, mahse, beisei an la phak lo hle - season hmasa ISL top scorer Diamantakos, Punjab FC thiampuipa Madih Talal, vaibelchhe 3.2 man Jeakson Singh leh Mohun Bagan duhlai Anwar Ali te an la lut a, I League-a hming chher David Lalhlansanga leh Hyderabad-a season duhawm tak hmangtu Mark Zothanpuia te pawh an lak zingah an tel a, result erawh an lei tel thei lo!

Kolkata club hian match thum hnuah coach Carles Cuadrat ban zuiin, coach lailawk Bino George hnuaia match khatah an tlawm a, coach thar Oscar Bruzon hnuaiah pawh match hnih an tlawm leh ta - a rang lama insiamṭhat an mamawh.