Flick-a 'Barcelona'-in Bayern an sawp

Barcelona-in Raphinha hattrick hmangin Champions League league phase-ah Bayern Munich chu 4-1 in an sawp. Spanish club enkawltu hi Bavarians manager hlui Hansi Flick a ni a, Bayern kawr mawipui tawhtu Robert Lewandowski-a'n Catalan club tan goal khat a khung bawk.

Lluís Companys Olympic Stadium-ah Bayern tana Harry Kane-a goal-in mualphona a hliah khuh zo lo. Vincent Kompany hote hi Bundesliga-ah hmahruaitu ni mah se Champions League-ah erawh Aston Villa an hneh tawh loh bawk avangin point thum chiah an la hmu a, 23-naah an awm.

A goal hma

Hansi Flick-a'n attacking football a khel ṭhin a, Barcelona a enkawl hnuah pawh a la chhunzawm zel. German manager Flick hian a club hlui Bayern lakah zahngaina a lantir lo.

Minute khatna lekah Barca-in goal an khung nghal a, Bayern tlarhnung leh goalkeeper inkar zau takah Fermín Lopez-a'n through ball ṭha pe lutin Raphinha-a'n a hmang ṭangkai. Barca captain hian Bayern keeper Manuel Neuer a bum hnuah goal hmahruai a khung.

Bayern-in an nawr let lehnghal a, game nghet ṭha tak khelin minute kuana lekah dinglam aṭanga Thomas Muller-a cross chu Kane-a'n a tauh lut. Kane-a ball tauh luh hi ṭha mah se VAR hmanga ennawn a nih hnuah offside vangin pawm a ni lo.

German club-in an nawr chhunzawm a, minute 18-naah an phu angin an khung ta bawk. Vei lam aṭanga Serge Gnabry ball pek chu Kane-a'n a khung.

Raphinha show

Bayern an inringtawk a, tlarhnungah ball inpe ngam mah se an huai sual teuh hle. Neuer-a ball pet chhuak tur chu Lamine Yamal-a'n dang hmanin goal-ah a lut teuh hle.

Minute 36-naah Bayern defender Kim Min-jae-a'n a chhut sual a, ball vawrhluh satliah tauh ṭhelh avangin Fermin Lopez-a'n keeper Neuer-a inrawlh hmain a pet hman a, goal ruakah Lewandowski-a'n a khung.

First half tawp hma hretin vei lam aṭangin Marc Casado-a'n ding lamah ball a vawrh thla a, Raphinha-a'n chang fuhin goal lamah a khalh phei a, Brazilian winger hian mawi zetin goal kilah a pet lut.

Second half-ah Bayern-in Joao Palhinha hmangin chance nei mah se a khung miau loh avangin German club-in an inkar an ti zim thei lo.

Raphinha erawhin a chance ṭha a hlah duh lo a, Barca hian counter attack aṭangin a vaw let nalh hle. Minute 56-naah Pedri-a'n rang takin Yamal a pe a, Barca rawlthar duhawm hian goal lamah vawrhluh nghalin Raphinha-a'n chak takin a khalh lut a, a pet goal - Bayern defender Kim leh Dayot Upamecano ten an um pha lo.

Beiseina beidawng

Bayern-in minute 60-naah Leroy Sane, Jamal Musiala, Kingsley Coman leh Leon Goretzka te a rualin a rawn luhtir nghal ṭhawt a, an goal bawh pawh a nat phah.

Mahse, goal hmaah Musiala a hriam tawk lo a, Sane pawhin goal a keng tel lo. Counter attack hmangin Barca an hlauhawm zawk a, Raphinha thlaktu Dani Olmo a hmuhnawm. Yamal leh Lewy te vanneih ṭum ni se goal an khung belh hial zawk ang.