Kanan FC hun a inher chhuak dawn?

Aizawl DFA First Division Phase II chu vawiin hian khelh zawh a ni dawn a, champion tur a chiang dawn. Tlai dar 4:30-ah Ramhlun North FC leh Dinthar FC te an inkhel ang a, zan dar 7:00-ah Kanan FC leh College Veng FC te an inkhel leh ang. Kanan, College Veng leh Ramhlun North ten champion beiseina an la nei vek.

Chawngthansanga enkawl Kanan FC dinhmun a ṭha ber a, champion chiang turin point khat a tawk a, an chak lo a nih pawhin an la champion thei cheu. Ramhlun North-in beisei tur nei lo Dinthar an hneh chuan Kanan dinhmun a ṭha daih.

A chhan chu, Kanan-in Ramhlun North an hneh tawh vang a ni a, head to head-ah an dinhmun a ṭha zawk. Chutihrualin Dinthar FC-in Kanan laka point an hmuh chuan College Veng beiseina a nung chiah ang. First Division-ah hian head to head en a nih avangin College Vengin Kanan an hneh a nih chuan an champion thei dawn.

Champion theih dan kawng hrang hrang thlirin Ramhlun North dinhmun a ṭha tawk lo a, chiang taka College Veng hneh chu beiseina chhi nungtu a ni thei ang. Kanan erawh nomawi chawi turin an inpuahchah thung ang.

Chawnga hote hi season liam ta khan league round round leh knockout-ah pahnihna an ni ve ve a, season hmasa lehah league round-ah chiang takin pakhatna ni mah se semifinal an tla.

Table thlir chuan coach Chawnga leh Kanan hun a inher chhuak dawn niin a lang a, mah se football-ah chuan eng result pawh thleng thei a ni.