Novak Djokovic a inhnukdawk

Novak Djokovic chu kar leh aṭanga khelh tur Paris Masters aṭangin a inhnukdawk - tun season chhungin a la inkhel leh dawn em, tih a sawi thei lo a, a tan kum a tawp zui a nih pawhin a mak lo ang.

Kum 37 mi Djokovic hi Paris Masters champion lai a ni a, Grand Slam dawta inelna ngaihhlut Masters 1000 huangah hian nomawi 40 ngawt a chawi tawh, major title 24 a neih bawk avangin nomawi aṭanga teh chuan a chungnung hle.

Serbian star Djokovic chuan, "Vanduai thlak takin kumin chu Paris Masters ka khel thei dawn lo. Vawi sarih ka lo champion tawhna hmun a ni a, sulhnu ka nei ṭhain ka lung pawh a leng dawn hle.

"Ka inlan theih dawn loh avangin hriatthiamna ka dil a, hma hun sawi lawk vek theih ni lo mah se kum thar lamah chuan kan inhmuh leh theih ka beisei," tiin social media kaltlangin a inlan loh tur thu a sawi.

Tun season tawp hmain ATP Finals khelh tur an la nei dawn, a thiam zual pariat inelnaa tel turin Djokovic hi a tling tawh. Mahse, Turin khawpuia inelna hmachhawn turin a inlan ngei dawn em, tih erawh a la sawi thei lo.

Kum 2017 aṭanga chhiarin Djokovic hian kum tin Grand Slam a la chho ngar ngar a, kuminah erawh nomawi lian chawi loin season a hmang tluan ve dawn ta a ni - a duh tak Olympic gold medal erawh a lak tho avangin a tan kum ṭha a ni.