MPL12 Qualifier: October 28 aṭangin khelh a ni dawn

MPL Board chuan MPL12 Qualifier leh Playoff khelh hun a tichiang a, MPL khel tur zawnna qualifier hi October 28, Thawhlehniah khelh a ni dawn. Playoff hi double leg-a khelh tur a ni dawn a, November 4, Thawhṭanni leh November 6, Nilainiah khelh a ni thung ang.

MPL Qualifier khel tur hian Aizawl pawn aṭangin Lawngtlai club MLS FC chauh an inziaklut a, Aizawl DFA hnuaia club pahnih nen an inel ang. District tinin quota pahnih zel an nei a, ADFA aṭangin Kanan FC an khel dawn tih a chiang tawh a, team pakhat zawk a la chiang lo thung.

Qualifier-ah hian team pathumte hi vawi khat ṭheuh an inkhel kual ang a, a sang ber hi MPL12 khel turin an tling ang. Qualifier-a pahnihna leh MPL11-a pasarihna Chawnpui FC ten double legged playoff an khel dawn a, away goal rule a awm dawn lo.

Qualifier leh playoff-ah hian CRS leh CMS hman a ni dawn a, MPL11-a khel tawh club-te hi qualifier-ah an khel thei dawn lo. Chawnpui FC pawhin MPL11-a an chhawr player-te chauh an hmang thei dawn.