Europe-a roreltu chu Slot-a Liverpool

Premier League hmahruaitu Liverpool-in khawvela league harsa ber ang hiala chhala hmahruaitu an nih chhan an pholang leh ta - Nilaini zan khan Champions League inkhelah RB Leipzig chu 1-0 in an hneh a, match thum an khelh tawhah an la chak vek!

Reds tan Darwin Nunez chuan inkhela goal awmchhun a khung a, German club-in a chhanletna tur an neih loh avangin Liverpool an chak - Pathianni zan dar 10:00 hian Arsenal khelmualah Reds hi league match khel turin an leng zui ang.

Liverpool hian inelna hrang hrangah match 12 khel tawhin vawi 11 an chak a, season khata khualmuala an match hmasa paruka an chak vawi khatna a ni bawk - coach Arne Slot-a hoin thawnthu ngaihnawm an ziak zel.

Reds an ṭha

Liverpool-in match 10-a vawi kua hnehna an chang chung pawhin tam takin an ringhlel a, Reds fixture hautak hun 'October' nghah thlen phawt an duh. Manchester United laka 3-0 a an chak hnu pawha rin hlawh lo club hian kar hmasa khan Chelsea chu 2-1 in an hneh phawt a, ringhleltute an chhang.

Match hautak neih hnuah Germany panin an zin a, harsa loin hnehna an chang zui - Leipzig keeper Peter Gulacsi chet ṭhat zan ni lo se, Reds hian goal tam zawk an khung hial ang. Reds reserve keeper hlui hian Darwin Nunez, Virgil van Dijk leh Cody Gakpo te khung ngei tur nia lang a dansak vek.

Minute 27-naa Nunez-a goal khung erawh Gulacsi tan pawh dan a harsa a, Mohamed Salah ball tauh ṭha tak chu Uruguayan striker hian a tlawh lut - a khung tur dang Gulacsi-a'n ṭha zeta a dansak chu a ui vawng vawng ang.

Hello Arsenal

Liverpool fixture a hautak tih zep rual a ni lo a, chutihrual chuan Reds squad chhah ṭhatzia kan hmu nawn. Leipzig lakah full back Andrew Robertson, Joe Gomez, midfielder Curtis Jones, forward Luis Diaz, midfielder Wataru Endo leh centre back Jarell Quansah te an awm thei.

Leipzig lakah hian khel ṭha em em mai Nunez chuan penalty a hlawh chhuak emaw a inti hman a, mahse, Willi Orban-a'n a tihtluk vanga penalty ni ngei tura lang chu referee-in a pe lo - Alexis Mac Allister-a crossbar pet per pawh uiawm a tling.

Alisson awm loh hlana si ban nghaktu Caoimhin Kelleher a chesual zuk a, a chetsual zarah Benjamin Sesko-a'n goal a khung teuh hle. Mahse, Irish keeper a insiamṭha zui a, Leipzig tana Sesko leh Xavi Simons te chance neih a dansak ve ve.

Hmabak chu

Liverpool hi Aston Villa nen match thum an khelh tawha la chak vek awmchhun an ni a, an tan knockout stage a hnai ta hle - an hmabakah Bayer Leverkusen (home), Real Madrid (home), Girona (away), Lille (home) leh PSV Eindhoven (away) te an la awm.

Chelsea player hlui Pat Nevin chuan, "Arne Slot-a'n November thla tawp lamah kan nihna dik tak chu insawi chauh dawn nia, a ti a, hetia a sawi chhan ber chu an khelh ṭhat lehzual zel a beisei vang a ni zawk," a ti!

Hetihrual hian Liverpool hian Arsenal zawhah, December 1 hmain Leverkusen, Aston Villa, Real Madrid leh Manchester City an hmachhawn hman dawn tih hria ila, Krismas hmain Liverpool 'tak tak' kan hrechiang lehzual ang.