State pawn boxer tan Rs 5,000

Zudio LPS Pro Fight neih turah Mizoram pawn aṭanga boxer inlan tur tan hamṭhatna a awm dawn, inelna buatsaihtu lamin boxer-te an kalna leh hawna man a tumsak dawn a ni.

Organising Committee chuan sumo chuan man angin, Aizawl aṭanga an kalna leh hawna man a tumsak dawn a. Championship-a an tel chhungin an thleng sang emaw an tla hma emaw an mamawh phuhruk nan Rs 5000 ṭheuh a pe bawk ang.

Inelna hmachhawn tum hian hming pe lut mi 320 an awm a, an zingah hian Mizoram pawh aṭangin Pro Fight ngaihluin boxer 13 inlan an tum - Lamka, (Manipur) aṭangin pasarih, Meghalaya aṭangin pali, Assam leh Myanmar aṭangin pakhat ve ve an awm a ni.

An inbuk fel hnua inhnek thei tur ziah luhte hnenah hamṭhatna hi pek a ni dawn a, he hamṭhatna hian tun dinhmuna Mizorama awm sa raltlante erawh a huam dawn lo thung.

Pro Fight vawi 11-naah hian Title Fight bik chauh khawvel puma professional boxing chhinchhiahna boxrec-ah ziah luh tur a ni a. Title Fight neih a nih hmain weight hrang hranga champion laite leh title chuh tura tlingte an inbuk ṭha leh dawn a ni.

Champion lai tel loin October 28, Thawhṭanni zing dar 8 aṭanga chhun dar 12 chhungin LPS Arena, Falkland-ah tel tumte an inbuk dawn a, an hriselna endik hmasak a ni ang. Hemi ni chawhnu dar 2:00-ah referee leh judge tur ten clinic an nei zui nghal bawk ang.

November 1, Zirtawpni zanah LPS Arena-ah inelna neih ṭan tur niin a hawnnaah hian Youth Icon Lalsangliana a zai dawn a, man chawi loin a hmunah a duh apiang tan en theih a ni ang.