Durant hoin Suns an chak hram

Basketball inelna lian leh ngaihhlut NBA regular season thar an khel ṭan a, inkhel hmuhnawm bik kan hmu nghal - nimin zing khan Kevin Durant awmna Phoenix Suns chuan Los Angeles Clippers chu 116-113 in an hneh.

Intuit Dome-a inkhelah team pahnihte hun pangngaiah an inhnehtawk, quarter lina an khelh zawh chuan point 103 ve ve an nei. Over time khelh chhunzawm a ni a, Suns lamin point 13 an neih belh laiin Clippers chuan point 10 an neih belh thung.

Phoenix Suns tan Durant a langsar, hun pangngai a tawp dawnah point neiin an khingpui an nih rual theih phah a, inkhel pumpuiah point 25 neiin team tana nei tam ber a ni tel bawk - ani bakah hian point 24 neitu Bradley Beal a langsar bawk a ni.

Inkhel dangah Golden State Warriors chuan Portland Trail Blazers chu 139-104 in an hneh. Golden State chak theih nan Stephen Curry chuan point 17 a nei a, season dang ang bawkin kuminah pawh mawhphurhna latu a ni leh ang.

Orlando Magic pawhin season bul ṭan fuhin Miami Heat chu 116-97 in an hneh a, inkhel dangah Milwaukee Bucks pawhin Philadelphia 76ers chu 124-109 in an hneh bawk.