RedBull Aizawl Tlangruam Tlan kawng an ti chiang

India rama urban downhill mountain biking event hmasa ber chu Aizawlah October 25-26, 2024 hian neih a ni dawn. Mizoram sorkar, RedBull leh Hyundai te ṭangkawpin an buatsaih inelna hi vawiin hian practice session an nei ang a, naktuk lamah inelna tak tak neih a ni ang.

Tlanna hmun tur hi Upper Republic, Republic Veng leh Republic Vengthlangah a ni dawn. Upper Republic Presbyterian biak in kawt aṭanga tlan ṭanin Holy Heart School lam an pan nghal ang a, Republic Veng YMA Lungphun bul Vawmluta step-ah an tla thla ang.

Vawmluta Step aṭangin Republic Veng Community Hall leh Presbyterian Biak In inkarah tlan chhuakin 'main road' an pawh ang a, PUC road lam zawh lo in Challiana Step-ah an tlan thlain Republic Vengthlang Presbyterian biak in an pawh ang.

Republic Vengthlang Biak in Mual step vei lam kawng pan zelin BCM Vengthlang Biak in lamah an tlan ang a, BCM Biak in aṭangin Hawla Stadium step-ah tlan thlain Hawla Indoor Stadium-ah a tawp ang.

RedBull Aizawl Tlangruamah hian Tomas Slavik (Czech Republic,) Pedro Burns (Chile) leh Jeronimo Paez (Argentina) ten an endik dawn a, mi 21 an inel dawn. Vawiin hian practice session an nei ang a, Inrinnia inelna tak neih hunah a ti ṭha 15 thlanchhuah an ni ang.

Thlanchhuah 15-te hi an inel lehnghal ang a, pakhatna chu South America lama neih tur Red Bull Cerro Abajo-ah a inlan thei dawn a ni.