Manchester City-in goal nga an khung!

Tun season Premier League-a goal chhuah ching tak Manchester City-in Champions League lamah goal an chhuah lo a, an mikhual Sparta Prague chu 5-0 ngawtin an sawp - match hnih goal a khung loh hnuah Erling Haaland pawhin goal a khung ve leh ta a, goal hnih a khung.

City tan hian Haaland bakah Phil Foden, John Stones leh Matheus Nunes (penalty) ten goal khat ṭheuh an khung bawk a, mikhual Sparta Prague tan English champion hi an ṭha lutuk hret a ni ber!

Pep Guardiola enkawl City hian tun season Premier League match riat an khelh tawhah vawi khat chiah goal chhuah loh an la nei a, Champions League match thumah an la chhuah miah lo thung.

Goal ropui chu

Etihad Stadium-a inkhelah City hian goal khung turin hun an mamawh rei lo. Minute thumna lekah Foden-a'n goal hmahruai a khung. Mahse, mak tak maiin City-in goal khung an harsat zui a, an inṭhelhsiak a ni ber!

Sparta Prague keeper Peter Vindahl-a'n Haaland-a khung tur leh Foden-a goal hnihna tur a dansakte chu pui tak a ni. Mahse, goal khung châka tuihal Haaland dan reng theih a ni lo a, 1-0 a chawlhlawk an hman hnuah 2-0 a an hmahruaina goal a khung.

Savinho-a ball cross chu Haaland hian sang taka zuang chungin a kheng lut a, goal mawi bik a ni - amah ber pawhin a awih lo em ni chu aw tih turin a lawm a, City an phur lehzual sawt.

A sur e

City-in an goal hnihna an khung a, chak tur a chiang tiin a sawi theih. Mahse, hetah hian an duhtawk lo. Wolverhampton Wanderers laka hun pek belha goal khungtu John Stones chuan minute 64-naah a belhchhah a, 3-0 a ni.

Haaland pawhin chawlh zai a rel chuang lo! Norwegian striker hian minute 68-naah a belhchhah a, hun tawp nan minute hnih chiah a awm tawh tihah Matheus Nunes chuan penalty hmangin a belhchhah bawk.

City-in penalty an hmuh hian Haaland chu lakchhuah a ni tawh a, kum 19 mi Nico O'Reilly-a'n a thlak. Kum 24 mi Haaland hi la chhuak lo ngat se chu penalty a pet ang a, hattrick siam mai tur a ni - Champions League-a goal 44 khung tawh striker hian a ui vawng vawng ang.