Lille lakah Atletico an mualpho

Atletico Madrid an mualpho - an hneh loh chu French club Lille an ni a, Champions League match hnih a zawna an tlawm tak avangin an tan knockout stage luh a harsa lehzual sawt dawn.

Madrid khaw club hian Julian Alvarez hmangin goal hmahruai an khung a, mahse, mikhual Lille-in goal thumin an chhanglet a, French club hian Atletico khelmualah 3-1 in hnehna an chang daih.

Atletico tan Alvarez chuan minute riatna lekah goal hmahruai a khung a, Ousmane Toure tihsual zar a zo. Atletico fan-ten chak an inbeisei a, mahse, an beisei angin thil a kal zui lo chiang hle.

Minute 61-naah Edon Zhegrova chuan mawi zetin Lille tan si phurh a sut a, minute 74-naah Lille hian penalty an hmu zui. Benjamin Andre lakah Koke a foul niin referee-in a ngai a, mahse, penalty tur niin a lang lo.

Video assistant referee (VAR) hmanga ennawn a ni chungin referee-in a thutlukna a sawh sawn duh lo a, substitute Jonathan David chuan minute 74-naah goal-ah a chantir.

Canada forward Jonathan hian minute 89-naah an goal thumna a khung zui - a shot chuan player dang a per hnuin, Atletico goalkeeper Jan Oblak-a'n ball kal dan a chhutsual a, a goal daih!

La Liga lamah pawh match 10 an khelhah la tlawm lo mah se, vawi nga lai draw nei tawh Atletico-in Champions League-ah pawh beisei an phak lo. Match hmasa berah RB Leipzig (2-1) hneh mah se, match hnuhnung pahnihah Benfica (4-0) leh Lille (3-1) an ngam lo a, point thum chiah an la nei.

Bruno Génésio enkawlna hnuaiah Lille hian beisei phak bakin season an hmang hrim hrim - match hmasa berah Sporting Lisbon (2-0) ngam lo mah se, Spanish club ṭha Real Madrid (1-0) leh Atletico a zawnin an hneh a, Madrid khawpui ngamtu ang hiala chhiar tlak an ni!