Inter Milan an chak hram

Serie A champion Inter Milan chuan Champions League-ah hnehna an chang hram a, awlsam taka an hneh tura ngaih Young Boys chu hun pek belha Marcus Thuram-a goal hmangin an hneh.

Young Boys khelmualah Inter hian penalty an hlawh chhuak a, mahse, Marko Arnoutovic chuan goal-ah a chantir thei lo - Young Boys keeper David von Ballmoos chuan a dansak a, a per lehlam hi Dumfries chuan khungna remchang nei mah se, Ballmoos hian a dang nawn.

Mahse, hun pek belh minute thumnaah substitute Thuram a inlar a, penalty chhuih lut lotu Arnautovic-a siamsak chu goal-ah a chantir - Inter hian match thum an khelh aṭangin point sarih an nei a, Swiss club Young Boys erawhin chak an la nei lo.