Tlawm nei lo Bengaluru inlan dawn

Nilaini zanah Indian Super League chawlh a ni a, nizan aṭang khan khelh ṭan leh a ni - zanin dar 7:30-ah pawh inkhel hmuhnawm en tur a awm dawn a, Kerala Blasters chuan Bengaluru an mikhual dawn.

Bengaluru hian beisei phak bakin season an hmang ṭha a, league match nga an khelh tawhah an la tlawm miah lo! Bangalore club hian match liah hnehna changin, match khat draw an nei a, table chung ber an luah mek.

Zaninah he thawnthu hi Kerala Blasters hian thlak danglamsak an tum dawn a, an theih leh theih loh kan hre thuai ang. South Indian club hian match nga khelh tawhah point riat an nei mek a, vawi khat an tlawm tawh.

Match hnih an chak a, vawi hnih draw an nei - an tlawm hi tun season ISL-a an match hmasa berah a ni a, match hnuhnung paliah an tlawm lo, tihna a ni. Zaninah pawh tlawm an tum lo ang.

Blasters hian midfielder pahnih Freddy Lallawmawma leh R. Lalthanmawia te an kawl a, Bengaluru-in midfielder midfielder Lalremtluanga Fanai an kawl bawk - Remtluanga hian bul la ṭan phak lo mah se, ISL-a match nga an khelh tawhah a la lut vek.