LPS Fitness Festival 2024 : Mister Mizoram Tetea; Men’s Physique Ruatfela

Bodybuilding & Fitness Association of Mizoram (BBFAM) buatsaih LPS Fitness Festival 2024 hmawr bawkna chu October 24, Ningani zan khan LPS Arena, Falkland-ah neih a ni a, Lalhmangaihsanga (Tetea) chu Mister Mizoram 2024 atan thlan niin Men’s Physique-ah Lalruatfela (Republic Gym) thlan a ni thung.

Saron Veng tlangval Tetea hi nikum khan Mister Mizoramah thlan a ni tawh a, kuminah a lallukhum hi a humhim. Men’s Physique-ah erawh David Muanthanga'n a lallukhum a humhim thei lo a, Lalruatfela'n a rawn luahlan. Junior Mister-ah Jerry Laldintluanga thlan a ni.

Tun ṭum fitness festival-ah hian IBBF international judge Nepram Kishan leh vawi riat Mister World ni tawh Arambam Bobby ten an telpui a, Nepram hi chief judge a ni nghal. Mizoram sports minister Lalnghinglova Hmar chu khuallian a ni.

LPS Fitness Festival 2024 hi chi hnihin ṭhen a ni a, October 16, 18 leh 21, 2024 khan HT Futsal Ground-ah fitness hmanga inelna neiin October 24-25, 2024 khan LPS Arena-ah Mister , Jr. Mister leh Men's Physique Championship neih a ni thung.

Mi bik Tetea

Mister Mizoram 2024 Tetea hi mi bik a ni a, body building bakah powerlifting leh pa chakah hming a chher tawh. Powerlifting-ah hian ama weight (93 below)-ah national champion lai a ni a, Mizoram chhungah lawmman ṭhahnem tak a dawng tawh a. Mizoram pa chakah champion lai a ni bawk.

Tetea hi Mizoram deadlift record kawltu a ni a, 322.5 kg a chawi thei a, bench press-ah 165 kg chawi theiin an weight 93 below-ah record dinglai niin 300 kg a squat thei.

Kum zawna Mister Mizoram ni thei Tetea chuan, "Ka nu leh pa, Malsawmdawnga leh Ṭhapari ten min phurpui a, chhungte tel lo chuan hlawhtlinna a awm thei lo. Ka hlawhtlinna hi min ṭawiawmna rah a ni," tiin a nu leh pa a chawimawi.

Tetea chuan sawi chhunzawmin, "Body buidling hi a hau tak a, ei leh in tih ṭhat a ngaih bakah mahni invawn a ngai bawk. Ka inelna hmachhawn tur ang zelin training ka nei a, tun ṭuma ka hlawhtlinna kawngah Thor Power Gym, Ramthar Veng chungah ka lawm takzet. Powerlifting leh pa chakah chuan Powerlifting Hall, Republic Vengthlangah training ka nei ṭhin thung," tiin Vanglaini a hrilh.

Thawhrim rah sengtu Ruatfela

Republic Gym-a kal ITI Veng tlangval Lalruatfela chu Men’s Physique 2024 atan thlan a ni a, tun ṭum inelnaa hlawhtlinna chang tur hian July thla aṭangin ngawrh takin inbuatsaihna a nei tawh.

Ruatfela hian Fitness Festival 2024 atan inbuatsaihna a kalpui char char a, September 14-16, 2024 khan 1st North East Bodybuilding and Physique Championship chu Sikkim-ah neih a ni a, hetah hian telin 175 cm below-ah silver a la.

T. Romana College zirlai Ruatfela chuan, "Mister Mizoram nen hian workout dan tlangpui hi chu a inang a, mahse physique-ah hi chuan kawng fek ṭhat te a ngai a, taksa vun a pan ṭhat a ngai a, inkhai thlit a ngai a, in uluk a ngai takzet. Mi tam tak chuan ke a pawimawh lo an ti a, mah se kei chuan ke pawh ka ngai pawimawh," tiin Vanglaini a hrilh.

Ei leh in pawh an uluk a, Ruatfela hian inelna tura a inbuatsaih ṭan hian ni khatah artui 10-15 a ei a, arsa 300g eiin zikhlum hi 100g zelin ni khatah vawi thum a ei a, whey protein scoop hnih a ei ṭhin bawk. Ruatfela hian nakuma neih tur Indian Body Builders Federation (IBBF) Eastern India atan a inbuatsaih lehnghal ang.