Arsenal mikhual tur hmahruaitu Liverpool

Premier League champion tum, mahse beisei anga season bul ṭan lo Arsenal chuan beisei phak baka season bul ṭantu Liverpool an mikhual dawn. Pathianni zan dar 10:00 hian English football hmuhnawm en tur a awm ang.

Zan inkhawm an bang hman dawn a, hla zir chhunzawm pawh an bang hman ang. Ṭhian hoa inkhel en khawm duh tan a hun a tawk vel a, mahni in luma uluk tak maia en duh tan pawh a hun a tawk vel - thingpui sen hang in chunga hmuhnawm thlir kha a nuam dawn.

Gunners hian tun season EPL match riat aṭanga point 17 hmuin pathumna an ni mek. Reds erawhin khelh zat inangah point 21 hmuin a chung berah an awm thung - Arne Slot leh a naute hi midang chunga leng mek an ni.

Saliba tel lohna

Mikel Arteta-a'n player hman thiam leh duh bik a nei, chung zingah chuan William Saliba a tel - France international hian season hmasa EPL match a khel kim, tun season match hmasa ho pawh a khel vek - zaninah erawh hrem vangin a inlan dawn lo.

Saliba ang bawka rinrawl Bukayo Saka erawh inlan thei tura beisei a ni. England international hi hliam vangin a chawl a, kar laihawla Shakhtar Donetsk nen Champions League an khelh pawhin a la inlan ve rih lo a ni.

Gunners league match hnuhnung bera Saliba hnawhchhuah a nih khan an chak lo zui a, inkhelh banah Arteta chuan Liverpool an hmachhawn hunah chuan an thawh chhuah hman tur thu a sawi, a thusawi hi a ti dik thei em tih chu kan hre thuai dawn.

Saliba chauh a ni lo a, defender pawimawh ni phak tawh Riccardo Calafiori a hliam bawk - mual sir lamah Oleksandr Zinchenko a luh a ngai mai thei, ani a luh chuan Mohamed Salah tan duhthusam a lo ni thung daih ang.

An tlarhnung phui hi Arsenal chana thuruk a ni ṭhin a, mahse tun season erawh nikum angin an la nghet tawk lo. Reds hmatawng tlan chak leh hriam tak tak hmaah chuan tihsual vawi khat lek pawh a pawi thui thei dawn, chuvangin an fimkhur zual a ngai dawn hle.

Tlarhnung chauh hi Arsenal buaina a ni lo, captain Martin Odegaard chu kerek hliam vangin a chawl mek a, a inkhel thei dawn hnai thung - Norway international hian Reds a hmachhawn a nih pawhin minute 90 khelh erawh a la harsa ang.

Odegaard awm loh karah tlarhma an siksawi fo - Declan Rice leh Kai Havertz ten mawhphurhna an la sang leh dawn tihna a ni a, striker Gabriel Jesus leh tawnhriat nei ṭha Jorginho bakah Thomas Partey an la neih avangin buai lo tura ngaih an ni.

Reds an dam bik lo

Liverpool pawh an ṭhat dan leh duh dan takin an inrem thei dawn bik lo. Reds manager Arne Slot chuan, "Diogo Jota, Federico Chiesa leh Conor Bradley te dinhmun a ziaawm tawh a, mahse tun kar tawpa inkhel tur erawh chuan an la inpeih lo.

"Goalkeeper Alisson Becker pawhin ziaawm lam a pan, amaherawhchu ani pawh hun rei deuh a chawlh a la ngai dawn," a ti. Reds hian tun season league match pariatah goal thum chauh an la chhuah a, goal chhuah tlem ber an nihna hi Gunners laka an chhuan tur a ni ang.

Jurgen Klopp a chhuah khan amah thlak tur hming hrang hrang a ri a, a nihna takah chuan Slot-a hi Kop ho suangtuah leh duhthusam a ni kher lo ang. Mahse, Dutch manager hian beisei phak bakin hna a thawk ṭha rih tlat, amah ringhlel tute pawh an ngaih a ngam viau.

Kum 46 mi Slot-a chuan, "Season kan ṭan chauh a ni a, tute nge kan elpui hautak ber sawi nan chuan a la hma mai thei, mahse Arsenal hi enlpui hautak tur chu an ni chiang. Elpuite laka aṭanga point hmuh a hlut tluk zetin point hloh a pawi thui dawn.

"Chelsea nen kan inkhelh dawn leh inkhelh zawh pawh khan ka sawi tawh a, hmachhawn an awlsam lo. Blues leh Arsenal khelh dan phung hi inanna lai a awm a, chutihrualin tun hnai season hnih thlir chuan Gunners hi team ṭha zawk an ni," tiin an khungpui tur a dahsang thiam hle.

Reds hian Mohamed Salah an la nei a, Egyptian forward hian a thiam a la theihnghilh lo - mual sir lama hlauhawm thei tak Luis Diaz an la nei bawk, tlarhma laiah aiin a sir aṭangin an hlauhawm lehpekin a rinawm a, hei hi tunlai Arsenal buai rukna a ni thung.