Mourinho-a'n a club hlui United a chelh

Manchester United leh lungawi lo taka inṭhen Jose Mourinho chuan a club hlui hi Fenerbahçe enkawl chungin a lo mikhual a, mahse, a chak zo bik lo - Europa League-ah team pahnih hi 1-1 in an inhnehtawk.

Fenerbahçe khelmuala inkhelah Manchester United hian goal an khung hmasa zawk a, Christian Eriksen chuan minute 15-na lekah English club tan goal hmahruai a khung. Manchester khaw club-te an phur hle.

Mahse, second half minute linaah Youssef En-Nesyri chuan Turkish club tan si phurh a sut a, goal dang lut loin hun a tawp - Europa League-ah United an la chak lo a, Fenerbahce an la tlawm lo thung.

Inkhel chu

United manager Erik ten Hag-a'n mak tak maiin full back Noussair Mazraoui chu number 10-ah a hmang a, mahse, Morrocan player a khel chhe lo - Eriksen-a'n goal a khung theih nan a thawhhlawk a, khelmualah a thawkrim takzet bawk.

Red Devils-in mikhual khelmualah hnehna chan theihna remchang an nei a, mahse, substitute Rasmus Hojlund-a'n goal khung theihna remchang taka awm Alejandro Garnacho hnena ball pek aiin shot a thlang a, goalkeeper Dominik Livakovic tan harsatna a siamsak lo.

United tan midfielder Manuel Ugarte a khel ṭha a, Ten Hag-a'n Premier League-ah a chhunzawm a beisei dawn. Keeper Andre Onana pawhin a theihna a pholang a, En-Nesyri goal khung tur ṭha zeta a dansak chu Mourinho pawhin kut a ben hnan!

Mourinho chu

Portuguese manager ṭawng duh tak Jose Mourinho a tel miau a, a club hlui hmachhawn a nih bawk avangin ngaihven a hlawh - Chelsea leh Real Madrid pawh lo enkawl tawh boss hi referee-in a hnawt chhuak a, technial area pawn lam aṭangin a naute a thlir a ngaih phah.

United midfielder Manuel Ugarte chuan penalty box-ah Bright Osayi-Samuel a titlu a, Turkish club-in penalty an beisei laiin referee-in a pe lo - a lungawi lohna lantir nasa tak Mourinho hi red card pek zui a ni.

Mahse, Inter Milan boss hlui hi a ngawi mai mai lo. Mourinho chuan, "Referee khan thil ropui tak min hrilh - game boruak sang, tlan chak ngai em emah khan penalty boruak vel kha a hmu vek a, bench lama ka chet dan a hmu tel bawk. Referee ropui tak a ni a, ka lawmpui takzet - khawvela referee ṭha ber a ni e," a ti!

United hmabak

Manchester United an chak zo lo a, an lawm lohna belhchhah turin Antony chu hliam vanga lakchhuah a ngai bawk - January-a chhuahtir mai an tum anga an sawi player hi a hliam a serious chuan United tan chhuahtir a harsa ang.

Red Devils hi inelna hrang hranga an match hnuhnung pasarihah vawi khat chiah an chak a, vawi nga an draw a, vawi khat an tlawm bawk. Erik ten Hag-a'n beisei angin English club a khai chhuak thei lo chhunzawm zel.

United hian Pathianni zan dar 7:30-ah league match khel turin West Ham an lenchilh dawn a, London club hi Premier League table-a an hnuaia awm ve leh chhawng an nih avangin fan-ten chak an beisei ang.