Joao Felix hoin Chelsea an chak

Chelsea chuan Joao Felix-a goal hnih hmangin Panathinaikos chu 4-1 in an hneh. Ningani zan inkhelah Blues tan hian Felix bakah Mykhailo Mudryk leh Christopher Nkunku ten an khung bawk.

Enzo Maresca-a'n team thar a din mek - Premier League hmahruaitu Liverpool an ngam loh hnuah an tlu hlen lo. UEFA Conference League khelin goal li an khung leh nghal a, an che buai chhunzawm duh lo.

Blues hian Conference League atan hian an player ṭha ṭhenkhat an la ziak lut duh lo, chung zingah chuan Cole Palmer pawh a tel - English forward hi Premier League lama rinrawl a nih avangin hahchawlhna hun an pe rih a ni.

Pathianni zan dar 7:300 hian Maresca-a naute hian Stamford Bridge-ah Newcastle United an mikhual zui leh nghal dawn - Greece rama zin chau tan Magpies hi mikhual awlsam an ni dawn lo.

Enzo Maresca-a'n Newcastle an mikhual tur hi a ngai pawimawh, Greek club lakah hian EPL lama a chhawr rim loh te an inlan hlawm, chutiang chung pawh chuan an buai lem lo, an squad a chhah tawk tihna a ni.

Italian manager Maresca chuan, "A tir lamah talbuai ve deuh mah ila kan insiamṭha nghal thei a, buaina kan nei zui lo. A hma lama ka sawi tawh ṭhin ang kha a la ngai reng, khelmual chhungah tute pawh lut ni se la Chelsea khelh dan phung an lantir kha a pawimawh.

"Player ṭha kan ngah a, vawi khatah an khel rual vek thei lo. Ka naute hian ka khelhtir duh dan an hria a, chumi kalhmanga anga an khel thei kha a pawimawh lai chu a ni," tiin a naute khelh danah a lungawi hle.

Newcastle United erawh tun kar laihawlah an inkhel lo, kar hmasa lama Brighton an ngam loh hnuah Blues hmachhawn turin chawlhkar khat chhung an inbuatsaih. Eddie Howe naute hian beisei angin season bul an ṭan fuh lo a, a zawna tlawm chu an hreh khawp ang.