Ka chau a ni - Foden

Premier League Player of the Season ni lai Phil Foden chuan tun season-a beisei a la phak loh chhan a sawi chhuak a, Manchester City midfielder chuan season hmasaa a inkhelh tam em vanga a la chauh thu a sawi!

Kum 24 mi Foden hian season hmasa khan inelna hrang hrangah match 53 ngawt a khel a, goal 27 khungin assist vawi 12 a nei. Foden chuan, "Nikumah khan kan inkhel hnem em em a, match tinah khan ka theihna zawng zawng ka hlan.

"Season ṭan a hun leh kha chuan ka chau hret a, thil nihphung ve reng pawh a ni. Rodri pawh keimah ang tho a ni a, player dang pawh an ni nual. Kan khelh zat enin thil awm ve tak a ni a, chutihrual chuan kawng dik ka zawh leh mek a, ka ṭhat dan berin ka lo kir leh hnai tawh e," a ti.

Foden hian tun season inelna hrang hrangah match kua chiah a la khel a, goal hnih khungin assist vawi hnih a nei a, a theihna leh thiamna thlirin a ropui lo rih hle - Premier League bikah phei chuan vawi nga chiah a la inlan a, heng zinga paliah hian bench aṭangin a lut.

Premier League-a bul a ṭan chhunah pawh lakchhuah a ni a, tun season league match-ah minute 90 khelh a la nei miah lo tihna a ni - goal a la khung lo a, assist vawi khat a nei thung.

Foden-a'n amah ang thoa inkhel hnem a sawi Rodri hi hliam vangin a chawl mek a, City hi an talbuai rih hle. Tun season Premier League match riat an khelh tawhah goal chhuah lohna vawi khat chiah an la nei!

Premier League champion lai hian zanin dar 7:30-ah league match khel turin Southampton an mikhual dawn a, Etihad Stadium-ah fan-ten goal chhuah loh an beisei ang.