Hei le - inhmuh châk El Clasico chu!

Zanin dar 12:30 hian Spanish football-a fixture ngaihven hlawh ber pawl chu khelh a ni dawn - Real Madrid-in Barcelona an mikhual dawn a, club pahnih inhmachhawn hi engtiklai pawha ngaihven hlawh ni mah se, thil thleng thei tam tak avangin tun season an intawng tur hian ngaihven a hlawh lehzual hle.

Barcelona hian Hansi Flick-a enkawlna hnuaiah harhtharna chang mekin, league table chung ber an luah mek a, match 10 khelh tawhah vawi kua an chak - an hnuai chiaha awm hi champion lai Real Madrid an ni a, an inkarah point thum chauh a awm.

Real hian hnehna an chan chuan Barcelona nen an point hmuh zat a inang chiah dawn tihna a ni a, Catalan club-in hei hi thlentir an duh dawn lo - coach Flick pawhin Santiago Bernabeu ngeia Real Madrid hneh hi a châk ngawt ang.

Club pahnih hnaih bertu, table-a pathumna Atletico Madrid chu Pathianni zan dar 11:00 hian an inlan dawn bawk a, khualmualah Real Betis an lenchilh dawn - Diego Simeone naute tan club pahnih hnaihna remchang tak a ni.

Real beiseina

Carlo Ancelotti naute hi La Liga-ah an tlawm lo rei tawh hle - thla 13 leh ni 42 zet chu tlawm loin Spanish top flight league-ah hian an kal tawh a, hetih chhung hian match 42 an khel hman.

Real hian La Liga-a tlawm lo rei ber record nih rual turin match khat chak an la mamawh a, an hmaa ding chu record ding lai chelhtu Barcelona an ni - hei tak hi zanin inkhel tingaihnawm zualtu a ni.

Barca hian 2017-18 inkar khan league match 43 zet chu tlawm an lo nei lo tawh a, an hmelma kunhlun Real-in record an rawn chelhpui tur hi an duh dawn loh avangin thih tha nen an bei ang.

A tawi zawnga sawi chuan zanin inkhel tur hi '3 points' inchuhna tur chauh a ni lo a, 'history' a tel. Real-in Barca hneh chung ngeia record siam an chak ang a, Barcelona-in theihtawp chhuahin dan an lo tum dawn thung.

A hming Vinicius

Real Madrid-in nipui transfer-ah thawm nei na takin Kylian Mbappe an la lut a, mi tam takin French striker lam an hawi - a tawpa thawm na zawk erawh an neih sa Vinicius Junior a ni a, Ballon d'Or dawng tura sawi forward hi Barca tan ven bik a ṭul dawn.

Vinicius hi Champions League-a hattrick siam hlim a ni a, a thawm reh zawk Kylian Mbappé pawhin match 13-ah goal riat ngawt a khung tawh tho. Barca tan Vinicius ringawta rilru pek chu a fuh lo ang!

Real hian league match 10 an khelh tawhah tlawm an la nei lo a, match thumah an khingpui an inhnehtawkpui thung. Bernabeu bikah chuan tun season-a an inkhelah tlawm an la nei miah lo a, Barca laka tlawm an tum dawn lo.

Jude Bellingham hi season hmasa aiin a thawm reh deuh mah se, goal khungtu aiin tlarhnung venpuitu a ni mah a, midfielder Federico Valverde a la rintlak reng a, Antonio Rüdiger leh goalkeeper Thibaut Courtois te pawh tlarhnung lamah paltlang an harsa ṭhin hle.

Flick-a Barca

Tun season-a mahni ram league leh Champions League-a team hmuhnawm ber pawl thlang dawn ila, Barcelona thlan loh an harsa - Flick-a hnuaiah attacking football hmuhnawm min chhawpsak a, striker chhuanvawr Robert Lewandowski pawhin vanglai a chen leh mek.

Barca hian La Liga-ah ringawt goal 33 an khung tawh a, anmahni hnaih bertu Real-in goal 21 an khung - an la inthlau vet vet hle. Champions League lamah pawh Barca hi 4-1 ngawta Bayern Munich sawp hlim an ni a, UCL-ah goal 10 khungin, club 35 zingah anni aia khung hnem chu Borussia Dortmund (12 goals) chiah an ni.

Kum 36 mi Lewy hian match 13-ah goal 15 khungin assist vawi hnih a nei a, Real tan ven bik a ṭul - chutihrual chuan Bayern laka hattrick siamtu Raphinha hian match 13-ah goal kua leh assist pariat a nei tawh a, match 13-ah vek Lamine Yamal chuan goal nga leh assist vawi sarih a nei tawh bawk!

Catalan club lawmna turin Frenkie de Jong, Dani Olmo leh Gavi te an dam tawh a, bul an ṭan erawh a la beiseiawm chiah lo - mahse, anni pathum tel loin Barca an buai lo a, Bernabeu-ah hnehna hlado chham tumin an leng ang.