Europa League Spurs an la chak vek

Europa League-ah Tottenham Hotspur-in Richarlison-a penalty hmangin AZ Alkmaar 1-0 in an hneh. Ange Postecoglou hote hi match thum khelh tawhah hnehna an chang la chang vek a, anmahni bakah hian Lazio leh Anderlecht te an la chak vek bawk.

Tottenham Hotspur Stadim-a inkhelah mualneituin inkhel an thunun zawk a, kum 17 mi Mikey Moore-a'n hnai tak aṭangin a tauh lut lo. Goal hmaah Timo Werner a hriam tawk lo. Second half-ah kum 18 mi Lucas Bergvall-a'n Dutch defender Maxim Dekker lakah penalty hlawh chhuakin Richarlison-a'n minute 53-naah chakna goal a khung.

Spurs hian October 27, Pathianni zan dar 7:30 hian Selhurst Park-ah Crystal Palace an tlawh dawn. Premier League-ah London club hian match riat aṭangin point 13 an hmu a, table-ah pasarihnaah an awm.

Europa League kalphung hi Champions League nen a inang chiah. Team 36 an awm a, group hranpa awm loin table pakhat an inṭawm. Team tin hian match riat ṭheuh an khel dawn a, an mual leh khualmualah match li ve ve an khel ang.

A sang pariatin last 16 an lut nghal ang a, pakuana aṭanga 24-na ten knockout playoff an khel ang. Pakuana aṭanga 16 thleng hi playoff-ah seeded an ni ang a, second leg an mualah an khel dawn.

British sports analytics company Opta thlirna aṭang chuan point 16 hmu chin chu a sang pariata awmna chance 98% a awm. Point 10 hmu chin chu a sang 24 zinga an awmna chance 99% a awm bawk