Thompson-a'n Mavericks tan record a siam

Klay Thompson chuan a team thar Dallas Mavericks tana a match hmasa berah sulhnu ṭha bik a hnutchhiah nghal - nimin zing NBA inkhelah point 22 neiin a team hi San Antonio Spurs lakah 120-109 in a chakpui.

Kum 34 mi Thompson hian Golden State Warriors tan season 13 a hman hnuah Texas lam hi a pan a, a match hmasa berah hian minute 26 chhung inlanin point 22 a neih bakah hian rebound vawi sarih a la a, an khingpui ball vawi thum a chhuhsak bawk.

Point 22 a neih zinga point 18 chu 3-points a shot aṭanga a hlawhchhuah a ni - Mavericks tan match hmasa ber khelh ṭuma 3-points nei tam ber reocrd a siam nghal, atan chuan hun chhinchhiah tlak a ni ngei ang.

NBA vawi li champion tawh Thompson chuan, "Bul ṭanna duhawm tak a ni. October thla chauh a la ni a, match hmasa ber a ni bawk. Kei leh ka team thar nihna teh nan chuan a la hma lutuk, eng dinhmun nge kan thlen zel dawn chu a la hriat chauh ang," tiin a sawi.

Thompson hi player ṭha Luka Doncic nen an inkawp chho dawn, a vanglai pel deuh tawh mah se theihna nei sang bik a ni a, amah ang bawka thawnhriat nei ṭha Doncic a lo awmsa bawk avangin Mavericks hi an hlauhawm dawn.

NBA regular season inkhel dangah Boston Celtics pawh an chak, a zawka hnehna an channa ni turin Celtics hian Washington Wizards chu 122-102 in an hneh.

Minnesota Timberwolves pawhin Sacramento Kings chu 117-115 in an hneh a, hetih lai hian Denver Nuggets erawh Oklahoma City Thunder lakah 102-87 in an chak lo thung.