Inter Milan mualah Juventus

Serie A champion lai Inter Milan chuan Pathianni zan dar 10:30 hian Juventus an lo mikhual dawn - Italian club pahnih hi champion tum ve ve an ni a, an pahnih inkhel hi a pawimawh dawn.

Italian club ropui pahnihte hi vawi 183 teh meuh an intawnna tur a ni dawn, an intawn tawhna hoa sulhnu nei ṭha zawk Bianconeri hi vawi 87 an chak tawh - ṭum 49 chak loin vawi 46 chu an inhnehtawk thung.

Thiago Motta enkawl Juventus hi Champions League lama chesual hlim an ni - an mikhualna ramah Stuttgart an ngam lo. An chak loh hnuah Motta hian chak phu lo zawk an nih thu leh, an match lehpek atan an insiamṭhat nghal tur thu a sawi a ni.

Old Lady hian insiamṭhatna tur match thlang thei ni se la chuan Inter Milan hi an thlang kher lo ang, mahse hun ruatsa a inherchhuak miau si a, dan theih a ni lo - an hna chu a hautak dawn takzet.

Inter leh Juve boruak a lian a, league hmahruaitu erawh Napoli an ni thung! Antonio Conte enkawl Naples club hian zanin dar 6:30 hian Lecce an mikhual dawn a, table mawngphah lama talbuai lai mikhual thlen hi an dinhmun sawhngheh theihna remchang tur a ni ang.

Conte-a tan Lecce hmachhawn hi a lunglen thlak dawn, player a nih laia a club hmasa ber niin match 81 a khelhsak hman - a hnuah Juventus a zawm leh a, anni pahnih lo chu player a nih laiin club dang a nei lo; a hmangaih hmasa a mikhual dawn tihna a ni.