Chennaiyin leh Goa an inhnehtawk

Ningani zan khan Indian Super League inkhelah Chennaiyin chuan FC Goa an mikhual a, team pahnih hi 2-2 in an inhnehtawk - South Indian club hi table-ah panga an ni a, tun season-a beisei phak lo FC Goa erawh pariatnaah an awm.

Chennaiyin hian season duhawm tak hmangtu Wilmar Jordan Gil hmangin goal hmahruai an khung a, FC Goa hian chawlhlawk hmain Udanta Singh hmangin si phurh an sut a, second half minute 51-naah Armando Sadiku chuan penalty hmangin a khung bawk.

Mikhual team zawk hian chak an inring hman a, mahse, an beisei ang ngawt erawhin a kal lo - Chennaiyin tan Daniel Chima Chukwu chuan minute 79-naah si phurh a sut ve leh a, 2-2 in a tawp.

Jawaharlal Nehru Stadium, Chennai-a inkhelah hian half time laiin Chennaiyin hian an coach Owen Coyle chu contract thar an ziahpui thu an puang a, Scottish club hi kum 2026 thleng an hnenah a cham dawn. Mahse, Owen Coyle-a'n contract thar a ziah thu an puan zanah chakin coach contract thar an lawm thei lo.

Chennaiyin tan PC Laldinpuia leh Lalrinliana Hnamte ten ṭum dang ang bawkin inkhel bul an ṭan a, NorthEast United laka red card hmuh vangin Laldinliana Renthlei a inlan thei lo thung. FC Goa lamah Ayush Chhetri chu bench aṭanga luhtir a ni.