Liverpool tan Wolves an lian tawk lo

Premier League champion Liverpool-in champion zia an chhuah leh ta a, an mikhual Wolverhampton Wanderers lakah zahngaihna lantir loin 4-0 in an chak. 

March thla hnua a vawi khat nan Anfield-ah fan-ten inkhel an en thei leh ta a, Liverpool player-ten goal li nen an fan-te hi an mualah an lo lawm let. 

Reds tan Mohamed Salah, Georginio Wijnaldum, Joel Matip leh Nélson Semedo (own goal)-ten goal khat ṭheuh an khung a, Wolves-in a chhanletna tur an nei lo. 

Liverpool-in hnehna an chan avangin table-ah pahnihna an ni chhunzawm a, an chunga awm Tottenham Hotspur nen an point hmuh zat inang mah se goal difference-a an hniam zawk avangin pahnihnaah an awm. 

Liverpool-in season hmasaah a vawi khat nan Premier League nomawi an chawi a, mahse, Covid-19 vangin fan-ten kawng zawhin champion an lawm thei lo a, stadium-ah takngial pawh an pungkhawm thei lo. 

Mahse, tun hnaiah UK sorkarin inkhuahkhirhna a thlah dul a, tier 2-a awm Liverpool khawpuiah fans 2,000 thleng an punkhawm theih avangin Anfield-ah champion lawm pahin fans an lo kir. 

Minute 24-na lekah Liverpool fan-ten an duh an hmu nghal a, Jordan Henderson long ball chu Liverpool academy chhuak, Wolves captain Conor Coady chuan a awma lak thlak a tumna lamah a chesual. 

Salah ke bulah ball a tla a, Coady tan Egyptian forward tlan chak leh thiam hi um phak hman a ni tawh lo - kum 28 mi forward hian tun season Premier League match 10-a khelha a goal kuana ni turin a khung. 

Anfield-ah Liverpool-in inkhel an thunun chhunzawm a, tlarhmaah Salah, Roberto Firmino leh Sadio Mane-te an hmuhnawm - Firmino 'nutmeg' leh Mane-a 'Cruyff turn' te chu mit ti tlaitu an tling. 

Liverpool-in 1-0 a hma an hruai laiin Wolves-in penalty an hlawh chhuakah an inngai a, Mane-a'n penalty area aṭanga ball pet chhuah a tumna lamah Coady-a pet fuh niin a lang. 

Reds ṭantu nia seilian Coady-a tlu a, referee-in penalty spot a kawk - mahse, VAR-a inrawlh zui a, Mane-a'n English defender hi a tawk fuh lo tih a lan avangin penalty hi sut a ni. 

Minute 58-na a ni a, Wijnaldum hun a her chhuak. Dutch midfielder hian penalty area pawn aṭangin goal chung kil sirah a thlawh lut a, hliam vanga chawl mek Virgil van Dijk goal khung lawm angin a lawm zui. 

Liverpool-in goal hnih leka lungawi an tum lo - minute 67-naah Salah chuan box chhungah ball a thlawh lut a, defender Joel Matip chuan chiang zetin a tauh lut. 

Salah ball thlawh luh a ṭha takzet a, Matip-a chet ranna leh ball tauh thiamna hmuh hmaih theih a ni bik lo. Hliam vanga talbuai ngun ve tak defender goal khunga fans thawm a ring hle. 

Liverpool-in an goal thumna an khung hnuin Reds fan-te tan thil hmuh nuam tak a thleng zui a, hliam vanga a chawlh reng hnuin Trent Alexander-Arnold  chu Neco Williams thlak tura luhtir a ni. 

Arnold hian ṭum dang ang thoin tlarhnung ven bakah goal nawr hna a rawn thawk tel nghal a, Mane tana a ball cross chu Senegal forward-in a duh ang taka a pet hmain Semedo chuan an lamah a tlawh lut.

Liverpool tan left back Andy Robertson bawk chu player hmuhnawm a ni leh a, Wolves defender Semedo-a'n Scottish fullback hi a veng hneh lo ṭhin hle.

Wolves-in Arsenal laka inhliam striker pawimawh Raul Jimenez an chhawr thei lo a, Mexico international tel loin tlarhma lam a hriam tawk lo. 

Reds-in first choice keeper Alisson Becker inhliam vangin Caoimhin Kelleher chungah rinna an nghah nawn a  ngai a, Adrian aia thlan si ban nghaktu hian Daniel Podence leh  Leander Dendoncker-te hun ṭha neih chu ṭha takin a dansak. 

Wolves boss Nuno Espirito Santo chuan, "Zan harsa tak a ni a, inkhelh hma leh inkhelh chhung khan kan tih si loh, tih theih tam tak kan nei. Kan khel ṭha lo a, Liverpool an khel ṭha thung," tiin inkhel chungchang a sawi.