Mizo telna an chak lo

Pathianni zan Indian Super League inkhelah Mumbai City-in Odisha FC 2-0 a hneh turin harsatna an nei lo a, Bartholomew Ogbeche (penalty) leh Rowllin Borges-ten goal khat ve ve an khung. 

Odisha tan Daniel Lalhlimpuia leh hliam damkawr Jerry Mawihmingthanga ten inkhel bul an ṭan a, Chanmari tlangval Jerry hi hliamin a tlakbuak avangin Mumbai an hmachhawn hi tun season-a a inlan vawi khatna a ni. 

Pathianni zan inkhel dangah FC Goa chuan 3-1 in Kerala Blasters an hneh a, Igor Angulo chuan Goan club tan goal hnih khungin Jorge Mendoza chuan goal khat a thawh ve bawk. 

Blasters vanneih zan a ni lo. Vicente Gomez chuan 2-0 a nih laiin Kerala club tan bar a pet per a, Deportivo La Coruna midfielder hlui hian minute 90-naah si phurh sut ṭhen mah se centre back Costa Nhamoinesu hnawhchhuah a nih avangin Blasters tan thawh ngaihna a awm tawh lo - Angulo bawkin goal a rawn khung leh a, 3-1 in an tlawm. 

Kerala tan Lalruatthara chu minute 58-naah bench aṭanga luhtir a ni. Zanin dar 7:30-ah ISL match khat a awm leh dawn a, Bengaluru FC leh NorthEast United an inkhel ang. 

Highlander-ah hian midfielder Lalengmawia, Lalrempuia Fanai, Rochharzela leh striker Lalkhawpuimawia te 

an awm.