Bryant-a nupuiin a pasal thihna pawm har ti

Basketball legend thi ta Kobe Bryant-a nupui Vanessa chuan a pasal leh a fanu Gianna tihna chu a la pawm theih loh thu a sawi a, “Ka ngaihtuahnate hi thuin ka dah chhuak thei lo,” a ti. 

Los Angeles Lakers legend Bryant hi kum 41 mi niin a fanu kum 13 mi ‘Gigi’ nen helicopter chesualah January khan an thi a, California-a chetsualnaah hian mi pakuain an nunna an chan. 

Vanessa Bryant chuan instagram lamah a ngaihtuahna chungchang sawiin, “Kobe leh Gigi an awm ve ta lo tih hi ka thluak chuan a pawm thei lo a, an pahniha ngaihtuahna pakhata vei kawp reng hi ka thei lo a ni. 

“Kobe-a kal ta tih pawm ka tum a, mahse ka taksa hian Gigi a lo kir leh tawh dawn lo tih chu a pawm thei si lo. Hmabak tam tak nei ka fanu kha a thawh theih loh chuan engtin nge kei hi ka thawh theih bik ang?

“Mahse, ka fate pathum Natalia, Bianka leh Capri tan chak taka ka awm a ṭul tih ka hria a, anni tal ka la nei thei hi ka lawm em em a ni,” a ti. 

Hetihlai hian Gianna school luhna Harbor Day School basketball team chuan Gigi hak ṭhin jersey number 2 chu hak theih tawh loh turin an chawlhtir.