Ronaldo vs Messi: Tu nge ropui zawk dawn?

Champions League group stage draw neih a nih khan fan-ten phurna deuh an nei a, chu chu group khata Juventus leh Barcelona an awm dun kha a ni - khawthlang media-te titi tui ber a ni nghal.

Football fan-ten club pahnih intawng lai an hmu châk a ni satliah lo a, khawvela footballer ropui ber ang hiala mi tam takin an ngaih Lionel Messi leh Cristiano Ronaldo an intawn dawn vang a ni.  

Mahse, Juventus khelmuala team pahnih an intawn hmasakin beisei angin boruak a 'hot' lo a, Covid-19 vanga Italian club thiampuipa Cristiano Ronaldo inlan theih loh vang a ni pakhat. 

Turin khawpuiah Lionel Messi hoin Barca hi awlsam takin 2-0 in an chak a, zanin dar 1:30-ah Nou Camp-ah Juventus an leng ve thung dawn - team pahnih hian last 16 an luh ve ve tawh avangin boruak a sang kher lo thei bawk. 

Barcelona-in Ronaldo tel lohna Juventus chu 2-0 in Turin khawpuiah ngei an hneh a, he inkhelah hian Messi chuan penalty aṭangin goal khat a khung. 

Inkhelh zawhah Barcelona hian twitter lamah Italian club an fiam zui a, "Juventus, in khelmualah khawvela footballer ropui ber in hmu thei hi kan lawm takzet a ni," an ti a, Messi thlalak an pholang tel. 

Juventus an ngawi mai mai thei bik lo. Italian club hian, "Dictionary dik lo zawk in keu ngei niin a lang a, a dik tak zawk chu Camp Nou-ah kan la rawn hruai ang," tiin Barca an chhang zui. 

Barca-in Messi chu khawvela ṭha berah an ngai a, Juve-in Ronaldo chu ropui zawkah an ngai thung - player pahnih an dam ṭha ve ve a, zaninah an inlan beiseiin fan-ten Nou Camp lam an hawi ang. 

Thawnthu hlui vangin Barca leh Juve an ropui a, khawvela footballer ṭha ber chungchanga mi tam tak inhnialna Messi leh Ronaldo kawltu an nih avangin ngaihven an hlawh lehzual. 

Mahse, team pahnih hi tun season-ah an ropui lo dun hle - Champions League last 16 lut ve ve tawh mah se league lamah beisei an phak lo a, team boruak duhawm lai a ni lo. 

Barca hi club tenau Cadiz laka tlawm hlim an ni a, La Liga match 10 an khelh tawhah vawi li chiah an la chak a, vawi li tlawm tawhin vawi hnih an khingpui an inhnehtawkpui - table-ah pakuana an ni mek.

Juventus an ropui bik lo. Serie A match 10 an khelh tawhah vawi nga chiah an la chak a, vawi nga an khingpui an inhnehtawkpui - table-ah palina an ni mek a, inchhuang tur an awm lo. 

Barca-in Cadiz lakah Ousmane Dembele a inhliam thu an puang a, zaninah a inlan thei dawn lo. Dembele bakah hian Ansu Fati, Gerard Pique, Sergi Roberto leh Samuel Umtiti-te chu hliam vangin an inlan thei lo bawk ang. 

Cadiz laka chesual Oscar Mingueza aiah  Ronald Araujo chu Ronald Koeman-a'n a luhtir a rinawm a, khawthlang media-te tarlan hi rin tur a nih chuan Messi, Philippe Coutinho leh Antoine Griezmann-ten bul an ṭan dawn bawk. 

Juventus lamah  Merih Demiral, Giorgio Chiellini leh Gianluigi Buffon-te chu hliam vanga Barca hmachhawn thei lo tur chiang an ni a, player pawimawh inhliam dang sawi tur an awm lo. 

Tlarhmaah Ronaldo leh striker form em em mai Álvaro Morata chu inkawp tura beisei an ni a, forward Paulo Dybala chu bench lamah a awm dawn tihna a ni thung ang - Morata hian tun season Champions League-ah match nga khelin goal ruk leh assist vawi khat a nei tawh tih hriat a ṭha.