Champions League Thlirlawkna Juve khelmualah Real leng lut dawn
Zanin dar 12:15 hian Champions League semifinal hmasa zawk first leg khelh a ni dawn a, Italian champion hlim Juventus-in Spain club ṭha Real Madrid an lo mikhual ang.
Juventus hi Serie A champion hlim a nih bakah a zawna League vawili champion zawn thei an nih avangin an boruak ṭhat vanglai a ni a, an mikhual tur Real madrid hi an huphurh hran lo ang. Hetihlai hian Real pawh hi La Liga-ah pahnihna ni mek an nih bakah, an player pawimawh te an inlan theih dawn avangin an zam lo tura ngaih a ni.
Team pahnihte hi tunhmain Champions League /European Cup-ah vawi 16 an lo inhmachhawn tawh a, Real hi chungnung hretin vawiriat hnehna an chang thei. Vawikhat inhnehtawkin Juventus hian vawisarih hnehna an chang thung a ni. An sulhnu thlir chuan tean inbei tawk tak an ni a, zaninah pawh hian an inbei tawk leh hle tura ngaih a ni.
Mahni khelmual hmangthiam Vs khualmual hmangthiam
Zanina an inkhelhna tur Turin, Juventus Stadium-ah hian Juve hian UEFA competition-ah match 12 chhung hnehloh an tawng tawh lo a, Massimiliano Allegri enkawlna hnuaiah an khelmual an hmangthiam hle.
Hetih mek lai hian an khingpui tur Real Madrid hi khual muala hnehna chang thei em em an ni thung. Tunhnai khualmuala an inkhelh ṭum 11 aṭangin vawiriat hnehna an chang thei. Ṭum hnih inhnehtawk neiin nikum a Borussia Dortmund laka 2-0 a an tlawm bak kha chak loh an nei leh tawh lo.
Player pawimawh
Juventus midfielder pawimawh Paul Pogba chu malpui hliam vangin zanin hian ala inlan thei lo tura ngaih a ni. Pogba awm loh vang hian Inrinni zana Serie A-a an champion na goal khungtu Arturo Vidal a pawimawh lehzual ang. Tlarhmaah tun season inelna hrang hranga goal 28 khung tawhtu innghahna tlak Carlos Tevez a awm dawn bawk a, Real Madrid tlarhnung tan buaipui tham a ni ang.
Khawvel player ṭha ber bera ngaih sengkawm ṭhin tu Real Madrid-ah hian player langsar tam tak an awm mek a, chung zingah chuan Cristiano Ronaldo a langsar fal nalh. Ani hian a game hnuhnung ber Sevilla nen an inkhelh ṭumin hat-trick a siam nghe nghe. Ronaldo bakah hian James Rodriguez leh ball pet thiam Toni Kroos te inkawp hi ven uluk ngai tur an ni.