Boxing hmakhua a thim

Khawvel mipui in an nghahhlelh em em May­weather leh Pac­quiao an inhnek zo a, hmuhnawm lo takin defen­sive game khel tu Mayweather chak zawkah a ṭang. Boxing khawvel zawhna chu, "Boxing hian a thih phah mai ang em?" tih hi a ni ta.

Heavyweight boxing lamah Klitschko unau in ro an rel a, defensive game khel ṭhin an nih avangin an inhnek mi­puiin an ngaihlu tawk lo. Heavyweight boxer ropui tak tak Muhammad Ali, Joe Frazier , George Foreman, Evander Holy­field leh Mike Tyson te hunlai a phak lo hle.

Mipui nghahlelh ber inhnek a zo a, roreltu chu defensive game khel ṭhin Mayweather anih vangin boxing expert tam tak chuan boxing-in a hlutna a hloh mai an hlau hle a, boxing-ah lehzel defensive game en turin mipui in an sum an sen duh loh tial tial an ring.

Mayweather erawh a chawlh a hnai tawh a, a chawlh hmaa vawikhat bak inhnek tum tawh lo anga sawitu hi chuan mipui hmuhnawm tih­zawng a inhnek a tum vak lo. A ngaihpawimawh ber sum a hmuh chhung chuan a lawm tur thu sawitu kha a ni tlat.

Pacquiao nen an inhnek zawha chan­chinthar la­khawmtute hnena a thusawi pawh, "Kha inhneka ka tana pawimawh ber chu sum tam tak dehchhuah kha a ni a, kan tumah kan hlawhtling. Kan inhnek hma ni li chhung ringawt pawh khan dollar maktaduai 25 ka hlawh­chhuak a ni. Tunah chuan lei belh tur em em pawh ka nei tawh lo, sana leh car man to tak tak leh private jet ka nei tawh a, eng nge ka lei leh chuan ang?" a ti!