Boxing khawvel ngaihdan

Mayweather leh Pacquiao inhnek result in vawi li lai World Heavyweight champion ni thei awmchhun Evander Holyfield a tilawm lo, 'The Real Deal' tia hminglem an vuahsak chuan, "Engtinnge point an pek tih kha ka hriat chak chu a ni. Engtinnge Pacquiao kha a chak loh theih? Vawi tam tak a hnek a, a tha a za in a chak em em bawk. Ka ngaihdan chuan Pacquiao kha a chak zawk a ni," a ti.

A hunlaia weight division pathum champion ni thei Shane Mosley pawhin Holyfield-a ngaihdan a ṭawmpui a, Mosley chuan, "Ka point pek tur chu nise Pacman kha 7-5 vela chak tur a ni. Boxer pahnih kha an inbei tawk viau a, mahse ka ngaihdanah chuan Pacman kha a chak zawk," a ti.

Mayweather leh Pacquiao te lo hnek ve ve tawhtu Oscar De La Hoya pawh a ṭawng chhuak a, "Boxing khelh ve lema inveng leh tlanchhe reng chunga inhnek hi chu ka ngaina lo. Inhnek hmuhnawm hmuh beiseiin fan-te'n pawisa tam tak an seng a, an beisei ang inhnek kan hmuh tir tur a ni," tiin Mayweather tlanchhe nasa lutuk chu a sawisel.

Kum 20 leka upa nichunga WBC, WBA leh IBF heavyweight title kawl thei Mike Tyson pawh a thil hmuhah a lawm lo, 'Iron' Mike Tyson tia an koh chuan, "Kum nga chhung he inhnek hi thlahlel takin kan nghak a, a hmuhnawm lo hle a ni," a ti. Mahse American boxer hian Mayweather fak zuiin, "Inhnek kha a thuhnuaia dah dan a thiam em em a, a game-ah Pacman kha a hruai lut a ni. Tun hi Mayweather a hun a ni a, a hma a ding zo hi tunah chuan an awm rih lo," a ti.

Vawi li lai World champion lo ni tawh Carl Froch chuan, "Ka zawhna chu Pacquiao hi tunhnaiah a tlahniam nge Mayweather hi a lo thiam takzet zawk? tih hi a ni. Kha aia ṭha a khel tur khan Pacman kha ka beisei a, ka beisei ang ka hmu lo. Pacquiao khan chak zawk nia a inngaih thu a sawi a, a hresual a ni" tiin Mayweather chuan chak a phu zawk thu a sawi.