Pacman-a fan te an lungawi thei lo

A chawr chhuahna Philippines mipui in an ngaihsan rawn Manny Pacquiao a tlawm mai hi Filipino mipui te'n an ngaithiam thei lo a, inhnek ṭha leh tura duhtu an tam hle.

Mayweather nen an inhnek lai khan Philippines mipui maktaduai tel chuan an atchilh rawn boxer inhnek lai hi TV kaltlangin an en ṭhup a, hmun ṭhenkhatah chuan big screen-a enna tur ruamhman niin stadium, park leh theatre-ah mipui sing chuang pungkhawm in a huho te'n an en a ni.

British singer lar leh chhelo Ellie Goulding chuan, "A pawi lo e, Pacquiao ka tan chuan chak zawk i ni tho tho," tiin twitter lamah a ziak.

Actor lar Josh Duhamel pawh a lungawi lo hle, The Black Eyed Peas lama an hmeichhe zaithiam lar Fergie pasal chuan, "Tlanchhe chunga inhnek leh inveng reng i hmuh duh chuan a dan pangngaia Floyd inhnek lai en rawh. Hei aia fight ropui hi boxing hian a phu a ni. Chak zawk chu Manny kha a ni," tiin judge te ngaihdan a ṭawmpui lo.

Rocky film-a boxer lema lo chang tawh Sylvester Stallone pawh a ngawi mai mai bik lo, "Manny Pacquiao aia boxer hmuhnawm leh huaisen hi ka la hmu ngai lo. Boxer ropui ho inhnek ka en vek tawh a, Manny el pha tur an awm lo," tiin chak zo lo Pacquiao chu a dah sang hle.

Fiamthu film lama kan hriat lar Jim Carrey a ṭawng ngeiawm lehzual a, "Vegas-a thil thleng chuan beisei a phak lo hle mai. Boxing match an khel nge 'Dancing with star' show kan en zawk?" tiin inhnek chhung zawnga tlanchhia Mayweather chu a kap.

Philippines president Benigno Aquino III meuh pawhin thuchhuah a siam a, "Tunlai khawvela boxer ṭha ber pawl Mayweather i hnek khan Filipino mipui te inchhuang takin kan lo awm a, i chungah kan lawm takzet a ni. Filipino mipui te tan entawn tur i hnutchhiah a, enkawlna thuhmun pek kan nih phawt chuan khawvelah kan dingchhuak thei tih min kawhhmuh a ni," a ti.