Premier League Thlirletna Man City an him; Tottenham derthawng

Pathianni zan khan Manchester City chuan Sergio Aguero goal khat hmangin Tottenham Hotspurs 1-0 in an hneh a, tun season Premier League a goal 22 khung tu Aguero chu top scorer ni turin a dinhmun a ṭha tawh hle.

Aguero hian Tottenham lakah hian goal a khung thei hle An intawn ṭum sarih aṭangin Spurs goal-ah vawi 10 zet a khung thei. Spurs manager Mauricio Pochettino hian Manuel Pellegrini lakah hnehna ala chang miah lo a ni.

White Hart Lane a inkhelah hian mualneitu Spurs lamingoal khung theihna hun ṭha vawi eng emawzat nei mah se City keeper Joe Hart an sutlang zo lo. An thiampuipa Harry Kane chuan a goal 21 na tur a khung thei bik lo a, Aguero aiin goal hnihin a thun tlem zawk rih ta a ni.

David Silva through ball dawngtu Aguero chuan he inkhel a goal awmchhun hi minute 29 naah a thun. Goal a thun hma hian Aguero hian penalty hlawh ngei tura a inngaih chu pek a ni lo. Ryan Mason chuan first half-ah claer chance vawihnih nei mah se Joe Hart a khelh ṭhat ni a tawn fuh avangin goal a thun thei bik lo.

Argentine striker hian second half-ah an goal hnihna a thun leh teuh hle a, Fernandinho nena an inkawp chuan Spurs tlarhnung su hawng mah se goalkeeper Hugo Lloris an sutlang zo lo thung. Aleksandar Kolarov leh substitute Wilfried Bony te pawn goal an hlawhchhuak zo bik lo a, inkhel tawp thlengin goal dang a lut tawh lo.

Chak lo Spurs engtin?

Season tharah a sang paliin Champions League an khel dawn a, pangana in Europa League an khel bawk ang. Match 35 khelh tawh a point 58 hmutu Spurs hi tun dinhmunah table-ah parukna an ni mek. An hnuai chiahah awm Southampton nen an inthlauhna chu point khat chiah a ni.

Pangana Liverpool an phak lohna hi point thum chauh a nih avangin Europe a inlan an tumna chu ala tawp bik lo. Match thum khelh hmabak aṭangin point kua a la hlawhchhuah theih avangin Europa League khel turin beiseina an la nei thiang a, amaherawhchu team dang kutah an innghat tawh ang. An chesual a nih chuan Saints hnuaiah pawh an la awm daih thei tho bawk.

Eng nge an sawi?

City goalkeeper Hart chuan, "Tun season-ah kan duh leh beisei thleng pha chiah lo mah ila kan phak tawkah hian kan lawm a ṭul. Kan tlachhe ta duai tihna a ni hran lo a, keini aia khel ṭha zawk an awm avangin ka tluk lo a ni. Amaherawhchu hei hi kan awm hlenna tur a ni lo, season tharah chuan tun aia ṭha zawk hian kan lo kir leh ang. Chelsea ka lawmpuia, anni hian champion an phu ber reng a ni," tiin Chelsea a lawmpui thu a sawi lang tel.

Liverpool an la lehpelh theih a rin leh rin loh an zawhna changin Spurs manager Mauricio Pochettino chuan, "Ka sawi the bik lo. Tun season-ah vawi 11 zet chak loh kan nei tawh, a sang pali zinga tel tum tan chuan hei hi a tam lutuk deuh. Point khua hmuh theih la awm hi hmuh vek kan duh a, a tawp thlengin kan bei ang. Season tharah chuan champion nomawi chuh thei zinga tel ngei turin kan inbuatsaih a ṭul dawn a, tun seasona kan ṭhat tawk lohna te thir letin kan insiam ṭhat ngei a ngai a ni," tiin a sawi.