CT Group Cup Round of 32 khelh chhunzawm a ni dawn

5th May, 2015

Vawiin hian Lammualah CT Group Cup Inter Branch YMA Football Tournament, 2015 chu round of 32 khelh chhunzawm leh a ni dawn a, inkhel hmasa ber chawhma dar 10:00 hian Venghlui leh Chaltlang te an inkhel ang. Round of 32 thleng tur hian Venghlui in Bungkawn Vengthar 0-0 (P 6-5) leh Maubawk chu 2-0 in an hneh. Chaltlang hian Chungtlang chu 3-0 a an hneh bakah Jt. YMA. Sialsuk chu sikhat faiin an hneh bawk.

Chhun dar 12:00-ah goal la chhuah lo team pahnih Tuivamit leh Hnahlan te an inhmachhawn bawk ang. Tuivamit hian Dawrpui 4-0 a an hneh bakah Chaltlang N chu sikhat faia hnehin round of 32 an in pet tling. Match hnih an khelh tawhah Tuivamit hian goal an la chhuah lo. An khingpui tur Hnahlan hian an game hmasa pahnihah goal an chhuah bik lo a, Lengpui Model Veng chu 4-0 a hnehin Zemabawk chu 2-0 in an hneh bawk.

Inkhel hnuhnung ber chawhnu dar 2:00-ah match thum hnehna chang tawh Thingsul Diakkawn leh Chite Veng an inkhel ang. Thingsul Diakkawn hian round of 32 kalkawngah Republic VT (4-2), W. Phaileng (4-2) leh Ngopa (4-2) in an hneh. Chite Veng hian Venghnuai 3-0 a an hneh hnuah Zotlang chu 2-1 a hneh lehin round of 32 an inpet tling bawk.

Player pahnih hrem

Chaltlang North player Lalmawizuala leh Lalhumhima te chuan Tuivamit an hneh loh ṭuma referee an khawih avangin Disciplinary Committee chuan MFA leh District FA hnuaia club-ah kum 2015 chhung inziak lut lo turin an hrem.

Armed Veng an kal zel

Nimin khan CT Group Cup Inter Branch YMA Football Tournament, 2015 round of 32 chu Lammualah khelh ṭan a ni a, inkhel hmasa zawkah champion lai Armed Veng chuan 4-0 in Chanmari an sawp. Armed Veng tan hian first half-ah Vanlalduatsanga'n goal khat a thun bakah second half-ah Lalawmpuia, Lalbiakhlua leh Allan Lalhriatpuia ten goal khat ṭheuh an khung bawk.

Inkhel hnuhnung zawkah Ramthar Veng tan inkhel ṭan aṭanga minute khatna lek a Lalnunmawia goal thun chu Sihphir Venghlun tan Vanlalruata'n second half-ah a sut. Inkhel tawp thlengin goal dang a luh belh tawh loh avangin penalty shootout hmanga chak zawk zawn niin Ramthar Veng hi 4-3 in an chak.