Milan leh Napoli an chak

Serie A hmahruaitu AC Milan chuan Sampdoria mualah harsa takin point thum an hlawh chhuak. Franck Kessie-a penalty leh Samu Castillejo goal hmangin khualmualah 2-1 in hnehna an chang.

Pathianni zan inkhel dangah Napoli pawhin Crotone chu 4-0 ngawtin an sawp. Gennaro Gattuso naute hian point 20 neiin pathumna dinhmun an luah a, hmahruaitu Milan an phak lohna chu point ruk a ni.

AC Milan-in player hliam an ngah, Zlatan Ibrahimovic, Simon Kjaer, Ismael Bennacer, Rafael Leao leh Mateo Musacchio te an inlan thei lo vek. Inkhel bul ṭantu player 11 te chu chawhrualin kum 22 leh thla 10 chauh an ni hial.

Sampdoria lamin an club kum 120 tlin lawm nana an siam bik jersey an hak avangin chak an duh zual a, minute riatna lekah Lorenzo Tonell chuan goal khung theihna hun ṭha nei mah se a ball tauh chu Gianluigi Donnarumma-a'n a lo dang hman.

Milan tana Ante Rebic goal khung tur goalline aṭanga an pet chhuah hnuah penalty an hmu a, chawlhlawk hma chiahin Kessie-a'n khungin a team hma a hruaipui. Second half-ah Castillejo chuan khung belhin, mualneitu lam tana Albin Ekdal khungin awmzia a nei phak tawh lo.

Season hmasa khan AC Milan-in an coach Stefano Pioli ban an tum a, a thlaktu tur pawh an be hman hial. Mahse Pioli-a'n season chawhnu lamah a naute harhtharna a chanpui a, tun season-ah pawh an harhna hi an chhawm zel.

Italian manager chuan, "Ka naute kha an naupangin tawnhriat an ngah lo tih ka hria, mahse an theihna sanzia leh an ṭha tawk a ni tih ka hria a, chumi fiah tur chuan ka fuih. Khelmual an luh hnuah khan an kum chhut a ngai tawh lo.

"Player naupang zawkte an puitlin hun tur ka nghakhlel ṭhin a, chu hun chu a lo thleng mek niin ka hria. Hetiang teh thut hian a rawn thleng ang tih erawh ka suangtuah phak bik lo," tiin a naute chunga a lawm thu a sawi.

Lorenzo Insigne, Chucky Lozano, Diego Demme leh Andrea Petagna te goal hmangin Napoli chuan Crotone 4-0 in an sawp a, coach Gennaro Gattuso a lungawi rualin a naute chu nghelnghet taka khel turin a duh.

Gattuso chuan, "4-0 a chak chu duhthusam a ni a, chutih rualin player inzata kan inkhelh lai khan 1-0 chauhin hma kan hruai. A tam zawk kan nih hnuah erawh kan chungnung hle, table chung lama awm tur chuan khelh fuh nia chak hluai loin match tina point hmuh a ṭha," a ti.

Crotone midfielder Jacopo Petric-cione chu minute 49-naah hnawhchhuah a ni a, mualneitu ni mah se anmahni aia team ṭha leh chungnung zawk lakah kim loa an khelh hnuin an ṭang zo lo a, goal thum an chhuah belh.