PSG-in champion an hnaih

Laurent Blanc-a enkawl PSG in Ligue 1 champion nomawi chawi turin kawng dik an zawh zel a, Pathianni zan khan an khingpui Nantes chu khualmualah 2-0 in an hneh.

Bordeaux nen an inkhelh ṭuma a chet mawi loh vanga League match thum khel thei lo a hrem Zlatan Ibrahimovic-a lo kirna inkhelah hian striker Edinson Cavani chuan Paris Saint-Germain tan first half-ah goal hnih khungin a team te a chak pui.

Uruguay striker hian Ibra awm loh chhungin rintlak a nihzia a pholangin match thumah goal li a lo khung hman a ni.

Tun dinhmunah PSG hian match 35 khelh tawh aṭangin point 74 an hmu mek a, anmahni hnaih bertu Lyon aiin point thumin an sang mek. Match thum khelh hmabak an la neih avangin champion tur ala hriat loh a ni.