Bengaluru-in Bagan an um zel

Pathianni zan khan Kan­teerva Stadium, Bangalore-ah Bengaluru-in Kolkata club East Bengal 3-0 in an hneh a, I League hmahruaitu Mohun Bagan leh champion lai Ben­galuru inkarah point khat chiah awmin Kolkata club hi match khatin an khel tlem zawk.

Ashley Westwood team tan first half-ah Sean Rooney-a'n a khung a, second half-ah Sunil Chettri leh Robin Singh te'n goal khat ve ve an khung leh bawk. Bengaluru tan Lalchhuanmawia leh Lalthuammawia Ralte te'n starting eleven an chang a, bench aṭangin Beikhokhei Beingaichho a lut bawk. Champhai tlangval Thuama hi Hero of the Match a thlan a ni.

East Bengal coach Eelco Schattorie chuan, "Bengaluru hi pahnihna ni mah se Mohun Bagan an la hmachhawn dawn avangin 95%-in an champion ka ring," tiin a sawi.

Kum 43-a upa Schattorie chuan, "Team zawng zawng, Mohun Bagan leh East Bengal tiamin Bengaluru hi an entawn a ṭul. An keeper (Lalthuammawia Ralte) hi player lian bik a ni lo a, mah se training ṭha a nei tih chu a chiang a ni. Staff ṭha tak neih hi hun rei tak hlawhtlin theihna a ni," tiin an hneh loh team a fak.

Inkhel dangah Royal Wahingdoh-in an mikhual Salgoacar 4-2 in an hneh a, Seityasen Singh-a'n Shi­llong club tan hattrick a siam. Wahingdoh tan Mizo pla­yer C. Lallawmzuala leh Lal­chhawnkima te an khel tluan.