Serie A Roma pahnihnaah an awm
Serie A-ah Juventus an champion chiang tawh a, AS Roma-in Pathianni zan khan Stadio Olimpico-ah Genoa 2-0 a hnehin season thara Champions League khel turin an dinhmun a ṭha zel.
Roma tan Seydou Doumbia leh Alessandro Florenzi te'n goal an khung a, an elpui Lazio leh Atalanta 1-1 a an inhnehtawk bawk avangin pahnihnaah an awm. Serie A team pathumin season tharah Champions League an khel dawn a, match li khelh hmabakah Roma hi palinaa awm Napoli aiin point ngain an sang zawk.
Rafael Benitez-a enkawl Napoli hian Marek Hamsik, Gonzalo Higuain leh Manolo Gabbiadini te goal hmangin player 10-a khel AC Milan 3-0 in an hneh a. Napoli hian Champions League khelh beiseina an nei chhunzawm zel.
Milan hian point 43 hmuin 10-naah awm mah se coach Filippo Inzaghi chuan club enkawltu atana a ṭhat thu a sawi cheu. Inzaghi chuan, "Nikum nipui aṭangin Milan ka enkawl ṭan chauh a, engkim a thlak nghal vek theih loh. Ka enkawlna hnuaiah thil ṭha chu a awmin ka hria, ka chungchang hi an la ngaihtuah dawn a, chutihrualin contract nei lai ka ni," tiin a sawi.