Premier League champion Chelsea

Pathianni zan khan Chelsea-in Eden Hazard-a goal khat hmangin Crystal Palace an hneh a, Premier League-ah match thum khelh hmabak la awm mah se umpha thei an awm tawh lo.

Stamford Bridge-a goal awmchhun hi first half tawp hma chiaha lut a ni a, PFA Player of the Year Hazard penalty pet chu Palace keeper Julian Speroni-a'n dang mah se a per chu Belgian winger hian goal-ah a tauh lut ta tho. Goal dang a luh belh lo.

Arsenal supporter tih dan entawnin Crystal Palace ṭantuten "Boring Boring Chelsea" tiin an au dual dual mah se Chelsea ropuina a nep chuang lo. Chelsea hian tun season-ah goal 69 an khung a, Palace aiin goal 27-in an khung tam zawk. Premier League-ah goal chhuah tlem ber niin goal 27 chiah an chhuah a, an tlar hnung rem phui dan hi awmze nei a ni a, zir tham a tling.

Chelsea-in English League sang bera an ṭum nga champion-na a ni a. Tun hi an champion hmasak ber aṭanga kum 60-na a ni a, a hnuhnung ber aṭangin kum ngana a ni. Russian pa hausa Roman Abramovic-a'n kum 2004-a Chelsea a lei aṭang khan ṭum li an champion tawh.

Chelsea hian tun season-ah champion an phu takzet a, table chung berah hian ni 253 chhung an awm a; 2005-06 season-a an record 257 days leh 1993-94 season-a Manchester United record 262 days chiah an tluk lo.

Player thukhawchang

Chelsea captain John Terry chuan, "Tun dinhmun thleng tur hian kan thawkrim em em a, a lawmawm dan hi beisei phak bak a ni. Champion hi kan dam chhan a ni a, kan champion hmasak ber ṭum kha a danglam a, kum nga chhung nomawi chawi loh kha a hreawm a ni. Kan champion nawn leh hi ka lawm hle a ni," tiin a sawi.

Chelsea midfielder Nemanja Matic chuan, "Huntawp hamrik a rik chiah khan awm dan pawh ka thiam lo, ka tan chuan a hlu a ni. Premier League-a team ṭha tam zia hriat phei chuan a hlu leh zual, kan team hian chak duhna thinlung kan nei a ni," a ti.

Chelsea striker Didier Drogba chuan, "Tun ṭum kan champion lawmawm dan hi chu a nuam dangdai khawp mai. Chelsea hi ka tan chuan no. 1 an ni a, Ṭum thum nomawi ka chawi pui thei hi ka lawm a, tuna kan tih tur chu hahdam phawt a, chumi zawha champion lawm a ni," tiin a sawi.

Champion phu Chelsea

England striker hlui Alan Shearer chuan, "Vawi hnih khat chetsual chu nei mah se tun season-ah Premier League team ṭha ber an ni a, an champion hi engtik lai pawhin ka ring reng. Team dangin pawisa ṭhahnem tak hmang mah se an result a beidawn thlak hle. Chelsea hi champion phu an ni a, Jose Mourinho hi nomawi chawi thei bik a ni. Nikuma an champion lo kha hrehawm a ti ngei a, mahse tunah chuan manager ṭha ber leh player ṭha ber awm khawmna an champion," tiin champion team chu a fak hle.

Crystal Palace boss Alan Pardew chuan, "Chelsea, Jose Mourinho leh player-te ka lawmpui e. Champion hi an phu takzet a, football ti hlutu an ni. Chelsea hian season tir khan football hmuhnawm an lantir a, season chawhnu lamah an tih tur dik tak an ti. He team hian chak turin hmanrua an nei ṭha a ni," tiin a sawi.

Mourinho sawi hun

Portuguese manager Mourinho chuan, "I hlawhtlinna tawhna club-a i kir leh a nih chuan i hlutna leh i sulhnu tih chhiat huamin i kir tihna a ni. Chan huamin Chelsea-ah ka let a, hlawtlinna ka hmu nawn," tiin hmingchhiat huama a kir thu a sawi.

Chelsea boss chuan sawi zelin, "Chelsea thlang lo hian league awlsam zawk, cham­pion theih mai na club ka thlang thei reng. Amaherawhchu tun hmaa ka lo hlim tawhna club enkawl turin Europe-a league harsa ber ka thlang. Ka champion hmasak zawk ṭum aṭanga kum 10 hnuah nomawi ka chawi leh a, Chelsea history-ah hian ka tan hmun a awmin ka hria," tiin a hlawhtlinna chhuanawm tak chungchang a sawi.