Red Bull Tlang Ruam-in ngaihhlut a hlawh
India rama urban downhill mountain biking event hmasa ber chu October 26, Inrinni khan Upper Republic, Republic Veng leh Republic Vengthlang kawngah neih a ni a, Mizo mipuiin an hlut hle. Mizoram sorkar, RedBull leh Hyundai te ṭangkawpin an buatsaih Red Bull Tlang Ruam hi a hlawhtlin avangin buatsaih leh ngei tum a ni.
Inelnaah hian Taiwan aṭanga rawn kal Chiang Sheng Shan chu pakhatna a ni a, Red Bull Tlang Ruam-a pakhatna hi khawvela urban downhill event ngaihhlut hlawh ber South America lama neih tur Red Bull Cerro Abajo-ah a tel ang.
Mizoram sports minister Lalnghinglova Hmar chuan a hmunah a chhim a, Mizo olympian Lalremsiami pawh Red Bull athlete a nihna angin a tel bawk. Remsiami hi Red Bull-in a zinna senso zawng zawng an tumsak bakah hlawh hranpa a la nei bawk.
A boruak chu
October 25, Zirtawpniah tlan chhinna neih a ni tawh a, inelna neihna hmun leh a chhehvela mite ngaihven a hlawh ṭan. Inelna neih ni a thlen meuh chuan ngaihventu an tam tawh hle.
Republic Veng tlangval pahnih Cyebe Lalsangbera leh Alan Renthlei te chu thlan chhinnaa an chetsual avangin inelna takah an tel thei lo a, Lungdai tlangval C. Lalhriatdika erawh qualifying round-ah a che sual thung.
Tlanna sira en theihna laiah mipui an pung khawm a, thawm pawh an nei ṭha a, Red Bull lamin big screen-a en theihna an dah bawk. Red Bull mentor Tomas Slavik chuan, "Ram tih hian danglam bikna an nei vek a, Mizoram danglam bikna chu mipui an ni. An thawm a ṭha em em a, tlan an ti nuam hle," tiin Vanglaini a hrilh.
Pianchampha lawmna
Qualifying round-ah Indonesian biker Rama Teguh Adi Pratama chu pakhatna a ni a, inelna takah erawh Taiwan mi Chiang Sheng Shan chu pakhatna a ni thung.
Chiang chuan, "Ka pianchampha phaka pakhatna ka ni hi ka hlu hle. Mizoram nuam ka ti a, mipui an fel ka ti a, kan tlan kawng pawh nuam ka ti. Heilai hmun hi ka ngai hlu takzet a ni," tii Vanglaini a hrilh.
Taiwanese biker hian minute khat leh second 41.640-ah a tlan thleng a, kum 10 chhuang cycling event-a a inhman tawh avangin tawnhriat pawh a nei ṭha. Asian Downhill Festival champion vawi li a ni tawh a, national champon vawi 15 a ni tawh bawk.
Rinkai Rama a chesual
Red Bull Tlang Ruam-ah hian Indoneisian biker Rama chu pakhatna ni tura ngaih a ni a, inelna takah pawh bul a ṭan ṭha hle. Kawng harsaah a harsatna nei lo mah se kawng awlsam laia ngaih Republic Presbyterian biak in bul kawng kualah a a tlu.
Rama hi rang taka thoin a tlan lehnghal a, hetia a chesual chung hian minute khat leh second 46.867-ah a thleng pha tho a, pahnihna a la ni pha. A tisual tih a inhria a, inelna hmun a thlen pawhin a helmet a phelh zawhah lu a dawm nghal.
Lawmman sem zawhah Rama chuan, "Hliam chungin ka tlan a, chuti chung chuan ka tlan ṭhain ka hria. Ka vawi khat tihsual kha a pawi a, pakhatna ka nih loh avangin hrehawm ka ti takzet," tiin Vanglaini a hrilh.
Mentor Tomas Slavik chuan, "Inelna tak takah chuan chetsual a thiang lo a, vawi khat tihsual nghawng hi a lian ṭhin. Rama tan inzirna ṭha tak a ni dawn a, inelna takah chuan tihsual a thiang lo," tiin Vanglaini a hrilh ve bawk.
A hlawhtling e
Inelna buatsaihtu ber Red Bull hian Hawla Indoor Stadium kawtah FORB (Friends of Red Bull) tan hmun an siam a, helai hmun hi sawm bikte tana buatsaih a ni. Red Bull flavour chi hrang hrang bakah ei tur tui hnai tak tak a thlawn vekin an chhawp.
Mizoram sports minister Lalnghinglova Hmar chuan, "A hmuhnawm ka ti a, a ro thap ka ti. Tin, he thil hi infiamna piah lamah khawvel huapa Mizoram pholangtu a ni dawn a, a lawmawm ka ti. Hetiang Mizorama Red Bull-in Mizorama an rawn thlen hi a lawmawm ka ti takzet a ni," tiin a sawi.
Inelna zawh hian hian Red Bull mentor pahnih Tomas Slavik leh Pedro Burns te a rualin an tlan a, intihsiakna ni loin ennawm atana tlan an nih ang ngeiin a ennawm hle. Chilean biker Pedro chuan, "Engkim mai hi nuam ka ti. A hmun nuam ka ti a, tlan kawng hlauhawm mah se nuam ka ti a, mipuiin an hlut em em bawk," tiin Vanglaini a hrilh.
Vawi thum world champion ni tawh Slavik chuan, "Mizoramah hian kan rawn let leh ang," tiin tun ṭuma Red Bull Tlang Ruam chu a tawpna tur a nih loh tur thu a sawi.
