Chawnga 'Kanan FC' hun a inher chhuak

Yamaha ADFA First Division-ah Kanan FC chuan phase II-ah an khingpui hneh vekin an champion. Chawngthansanga enkawl Kanan hian champion turin match hnuhnung berah College Veng lakah point khat chauh mamawh mah se 'draw result'-ah an lungawi lo, 4-0 in hnehna an chang.

Kanan inkhelh hma hian Dinthar FC-in Michael K. Lalhriatpuia goal hmangin Ramhlun North 1-0 in an hneh. Ramhlun North, College Veng leh Dinthar ten point thum ṭheuh an hmu a, Laldampuia kaihhruai Ramhlun North chu goal difference hmangin pahnihna an ni a, Kanan FC nen MPL12 Qualifier an khel dawn.

Goal li a lut

RG Stadium, Mualpuiah October 25, Zirtawpni zan khan league match hnuhnung ber khelh a ni a, Kananin team ṭha zawk an nihna a pholang. Joseph Lalṭhafela freekick chu C. Lalnunsanga'n a tihbuai avangin College Veng defender C. Lalrinzuala'n a lamah a tauh lut.

Kananin minute khat pawh tling loah team game mawi tak hmangin an khung belh a, a hmawr bawktu chu Sangsanga a ni. College Vengin siphurh sut tumin an nawr na a, goal hmaah Kanan an hmui zawk.

Minute 90-naah Sangsanga'n mawi zetin a volley goal a, injury time-ah College Veng goakeeper chawpin an chhuak. Kanan defender Daniel Lalṭanpuia ball tauh chhuah chu Nicholas Vanlalhmahngaiha'n goalkeeper awm lohna College Veng goal lamah a khalh phei a, awlsam takin a khung.

Kanan FC tana mi pawimawh club president Lalramnghaka Pautu chuan, "Training kan nei ṭha a, kan thawh hona a ṭha a, chhungkaw lianpui ang kan ni. Kan inlungrualna leh kan thawhona Pathianin mal a sawm a, kan champion-ah ka ngai," tiin Vanglaini a hrilh a, coach Chawnga a fak bawk.

Ngaihnawm

Kanan FC hi Reitlang FC, Chanmari West, Chhinga Veng leh Chanmari FC enkawl tawhtu Chawngthansanga enkawl a ni a, an tum chu Mizoram Premier League khelh a ni. Chawnga chuan, "Kan hotute an fakawmin ka chhuang takzet a, kei ngei pawh ka beidawng lek lek tawh chung pawhin keimahah rinna tun thlengin an nghat a, an chungah ka lawm. Mahse, tum ber chu MPL khelh a ni a, kan tum kan la thleng lo," tiin Vanglaini a hrilh.

Chawnga hian kum 2015 khan Kanan FC a enkawl ṭan a, Second Division-ah 2016-17 season khan champion puiin First Division a kaipui a, Chhinga Veng enkawl nei mah se kum sarih chhung chu Kanan a enkawl tawh.

Kum 2019 khan Chawnga hian Kanan hi First Divison-ah a champion pui tawh a, MPL Qualifier-ah an vanduai thung. Season hnuhnung pahnihah league round-ah an che ṭha ve ve a, mah se playoff an khel ṭhat loh avangin MPL qualifier an khel pha lo.

Kuminah erawh First Division specialist tih ngam Joseph Lalṭhafela an lalut a, champion-na kawngah a pawimawh hle. Joseph hi midfield-ah khai pha a ni a, tun ṭumah hian best player-a thlan a ni. Hei chauh hi a ni lo, First Division hnuhnung pahnihah Sihphir Venghlun leh FC Bethlehem champion puiin best player a ni ve ve.