Covid-19 vanga buai AZ

Zanin dar 10:30 hian Napoli mualah AZ Alkmaar an lenglut dawn a, Dutch club hi coronavirus vangin an buai hle. Tun hnaia an squad player zinga pariatin hri an kai a, a hma lama lo kai tawh nen mi 13 ngawt an inlan thei dawn lo.

Hri leng vangin buai viau mah se AZ hi Italy lamah an zin dawn tho, an ṭhat dan takin an khel thei dawn lo tih erawh thil chiang sa a ni. AZ chuan thu chhuah siamin, "AZ chuan dan leh hrai kan theih tawpin kan zawm.

"Khawpui thuneitu lamin rem thih lohna an nei hran lo a, hei vang hian UEFA thu leh hla angin player 17 chauh nei mah ila inkhel turin kan zin chhuak ang," an ti. Kar hmasa khan an player pali khel thei lo chungin Dutch League-ah VVV Venlo an lo hmachhawn tawh a ni.

AZ nena inkhel tur Napoli pawh hi tun hnaiah hri leng vanga buaina tawk hlim an ni. Juventus nen an inhmachhawn dawnin Naples khawpuiah hri kai thar an tam a, hei vang hian inkhel turin an zin chhuah khap a ni hial.

Mahse Serie A thuneitu lamin inkhel turin thu an ti tlu si, mualneitu Old Lady chu 3-0 a chaka puan an ni a, inkhel lo Napoli hi point khat an paihsak bawk. Covid-19 vang hian football pawhin buaina a la hmachhawn zauh zauh dawn niin a lang.