Asia ban elh chak ber Denic-a!

October 26, Inrinnia neih zawh tak Asian Arm Wrestling International Cup-ah Mizo tlangval Denic Lalruattluanga chuan gold medal a hlawh chhuak a, ITI tlangval hi 80 kg Senior Men Right hand huangah inlanin, gold medal hi a hlawh chhuak a ni.

Denic-a hian national level-ah pawh gold lo la fo tawhin Mizoram tihmingṭhatu a lo ni tawh ṭhin a, Mumbai khawpuia neih inelnaah hian India aiawhin Mizo dang pawh inlan an awm nual - gold pakhat bakah hian silver pahnih leh bronze pakhat Mizo ban elhchakte hian an hlawh chhuak.

Hetihlai hian Melthum nula Vanramnghaki chuan 80 kg Senior Women Left and Right-ah silver medal a hlawh chhuak a, Para 80 kg Women-ah bronze a hlawh chhuak bawk - medal pahnih nen Vanramnghaki hi a lo haw tihna a ni.

100 kg Senior Men Right-a inlan Benjamin Lalawmpuia Ralte pawhin final lut mah se, gold erawh a hlawh zo ta lo a, silver medal a hlawh chhuak - India tan ban elh chak pathumten medal pali ngawt an hlawh chhuak tihna a ni a, a ropui hle.

October 19 aṭanga neih ṭan inelnaah hian Winkle Laltlanchhunga chu -80 Kg Senior-ah India tan a inlan ve bawk a, ani erawh vanduaiin medal a hlawh chhuak zo ve ta lo a ni.