Barcelona-in Real Madrid an hre lo!

Santiago Bernabeu-ah Real Madrid fan-ten zakin an hmai an hup a, an hmelma kumhlun Barcelona hmaah dawl zawrin an zawr - club pahnih inhalzia ngaihtuahin Real tan hei aia zahna sang zawk a awm thei kher lo mai thei!

Inrinni zan khan El Clasico-ah Barcelona-in Real Madrid an lenchilh a, 4-0 ngawtin an sawp. Catalan club tan striker 'form' em em mai Robert Lewandowski chuan goal hnih a khung a, Lamine Yamal leh Raphinha ten goal khat ve ve an khung bawk.

Bernabeu-a fans pungkhawm 78,192 zinga a tam zawkin an hmuh duh an hmu lo a, kil tinah Barca an chungnung zawk. Hansi Flick-a nauten anmahni hnaih bertu Real Madrid an hneh avangin point ruk ngawtin hma an hruai fal ta a, La Liga champion ni turin kawng dik an zawh zel.

Real boss Carlo Ancelotti chuan, "Zan duhawm lo tawpkhawk a ni a, tlawm hi chu a nuam ngai lo - a bik takin rei tak tlawm loa kaltluan tawh hnua tlawm chu a na duh bik a ni," a ti a, Barca an ngam lo chu hrehawm a tih thu a sawi.

Duhaisam mai maw...

Real-in Barcelona an hmachhawn hmain league match 42 chhung chu tlawm an nei tawh lo a, La Liga chanchinah anni aia tlawm nei loa kal rei chu Barcelona chiah an awm - Barca hian match 43 (April 2017 - May 2018) zet chu tlawm nei loin record an lo siam tawh.

Madrid-in an hmelma kumhlun record nih rual theihna hun ṭha an nei a, an hmachhawn tur lah record chelh mektu Barca ber kher an ni - Bernabeu-ah an la inkhel zui a, Real tan chuan Barca hneh chunga an record nih rual aia duhthusam ropui zawk a awm chuang lo.

Mahse, Real beiseina chu mumang ram satliah mai a ni a, Catalan club-in an record nih rual an lo rem ti reng reng lo - Real chalah chil an lo hnawmsak a, an duhthalin an nghaisa zui a ni ber mai!

Team pahnih hian first half-ah goal an khung lo a, mahse, chawlhlawk laiin Flick-a'n a naute a fuih ṭha zawk niin a lang - khelmual an luh leh meuh chuan goal li ngawt an khung a, Real-in tihngaihna an hre lo.

Val upa Lewy!

Minute 54-na a ni a, Barca-in goal an khung - Marc Casado through ball chu Lewandowski-a'n um lutin goal-ah a chantir a, minute hnih hnu lawkah Alejandro Balde-a cross chu ṭha zetin a tauh lut bawk. Rei lotêah chak tur a chiang tiin a sawi theih.

Lewy hi a vanneih zan ni se, hattrick siam thei a ni hial. Mahse, a chance neih pakhat chu woodwork tihper nan a hmang a, hnai set sawt aṭangin a khung lo bawk - Polish striker hian a thlirlet ang a, a ui vawng vawng ang.

Kum 36 mi ni tawh mah se, Flick-a enkawlna hnuaiah Lewy a vul thar leh a, tun season inelna hrang hrangah match 14 khelin goal 17 a khung ta der a, assist vawi hnih a nei bawk.

Lewy-a goal khung hnuah Yamal leh Raphinha ten an khung ve leh a, Real an tho tawh lo. Raphinha pawh hi a 'form' rem rem hle - El Clasico-ah hian goal a khung bakah Yamal-a khung tur a siamsak a, Raphinha hian tun season-ah match 14 khelin goal 10 a khung tawh a, assist vawi kua a nei.

Rawlthar rual Barca

Barcelona vanneihna chu tawnhriat nei ṭha Lewy an nei a, a pawlh mawi tura rawlthar ṭha tak tak an nei tel hi a ni - El Clasico-a bul ṭan zinga paruk chu Barca academy chhuak an ni a, Catalan club hian an system bel tur player an chher chhuak ṭha ṭhin.

Kum 17 leh ni 106 mi ni chungin Yamal-a'n goal a khung a, El Clasico-a goal khung thei naupang ber record, kum 77 zet lo ding tawh chu a khum - Yamal hmaa El Clasico-a goal khung thei naupang ber hi Barca player tho Alfonso Navarro niin, record a siam lai hian kum 17 leh ni 356 mi a ni.

Yamal hian tun season inelna hrang hrangah Barca tan match 14 khel tawhin, goal ruk a khung a, assist vawi sarih a nei bawk. El Clasico-a bul ṭan zingah club academy chhuak ṭhiau, kum 17 mi Pau Cubarsí, kum 21 mi Alejandro Balde, Casado, Pedri leh Fermín Lopez an tel bawk.

Kum 20 mi Gavi pawh bench aṭanga luhtir a ni a, hliam vanga an chawlh vang vang hnua Frenkie de Jong leh Dani Olmo te bench aṭanga an lut hmuh tur awm pawh Barca fans tan chuan lawmna a tling.

Vinicius & Mbappe

Zanin dar 1:15-ah khawvela footballer ṭha ber hnena pek ṭhin Ballon d'Or semchhuah a ni dawn a, Real Madrid forward Vinicius Junior-a'n a dawng dawn niin khawthlang media tam tak chuan an tarlang - L’Equipe’s YouTube channel-ah live-in a en theih dawn.

Mahse, Dortmund laka hattrick siam hlim forward hi Barcelona lakah a 'bo' a, Ballon d'Or a dawng tak tak a nih chuan Barca sawp hlim ni chungin khawvela footballer ṭha ber award a dawng dawn tihna a ni - a duhthusam chu a ni bik lo tawp ang.

Kylian Mbappe-a'n Paris St-Germain tana a khelh laiin, February 2021 khan Nou Camp-ah hattrick a lo siam tawh a, Real Madrid jersey nena Barca a hmachhawn hmasak berah erawh a nil chiang hle - French forward hian tun season inelna hrang hrangah match 14 khel tawhin goal riat chiah a la khung.

La Liga Player of the season ni lai, season hmasaa goal 19 khungtu Jude Bellingham pawh a ke a hmui thei lo! Kum 21 mi midfielder hian tun season-ah goal a la khung miah lo a, Barca lakah pawh a reh hle.