Man City chakna Erling Haaland

Premier League champion lai Manchester City chuan Inrinni zan khan an mikhual Southampton chu 1-0 in an hneh, goal awmchhun hi striker ṭha Erling Haaland khung a ni.

Etihad Stadium-a inkhelah goal kan hmu hma, minute ngana lekah Haaland chuan a khung. Norway international hi box chhungah Saints player ten an bawr a, mahse mual sir aṭanga Matheus Nunes-a siamsak chu a khung tho.

Haaland hi defender chak ve tak mai Jan Bednarek chuan dan tumin theihtawp a chhuah a, tharum pawh an hmang nasa. Mahse, Haaland hian laklawh nei loin a khung ta tho a, keeper Aaron Ramsdale chuan a lo dansak thei lo a ni.

Pep Guardiola naute hi Premier League-ah an tlawm lo rei ta hle, nikum December 2 khan Aston Villa an hneh lo, a hnu lamah match 32 chhung chu tlawm loin an kaltluang ta, kum khat cham thleng turin chawlhkar ruk chauh an mamawh tawh.

Man City an kal fuh laiin Southampton erawh an ṭum fuh ni a thleng thei lo. Thla nga liam ta mai khan Russell Martin-a hian Saints hi EPL khel turin a tlinpui a, an boruak a ṭhain beisei pawh an nei sang hle.

Mahse, English football inelna sang berah hian tun season match kua an khelh aṭangin point khat chiah an la hmu, table mawngphah luahtu an ni. Tunah chuan a hna chân mai thei dinhmunah a ding ta, a hma hun tur sawi lawk a harsa ta hle a ni.

Guardiola erawhin Martin leh a naute khelh dan a dahsang hle thung. Spanish manager chuan, "Ball keng thei an ngah a, an duh danin an thunun thei ṭhin. A bik takin striker ball an pek leh pawh dan vel khan ka mit a titlai, an chet dan aṭang khan thil tam tak ka zir dawn a ni," a ti.