Chhinga Veng hnehin Tuichangral an champion

Mizoram Volleyball Assocaition buatsaih - MUCO Bank Ltd. MVA Invitational Volleyball Tournament 2024 chu Inrinni zan khan khelh zawh a ni a, mipa inelna huangah Tuichangral an champion.

Thutak Nunpuitu Team (TNT), Muanna Vengah inelna hi khelh niin, final hmuhnawm takah Tuichangral hian set hloh hmasa zet mah se an khingpui Chhinga Veng Spikers chu 3-1 (26-24, 19-25, 20-25, 23-25) in an hneh.

Tuichangral tan Lalbiakmuana a hmuhnawm a, an champion theih nan a thawh hlawk - a phu ang ngeiin Best Spiker atan thlan a ni bawk. C, Zonunmawia leh Vanlalmawia ten mimal chawimawina dawng khawpin an khel ṭha bawk.

Inelnaah hian Pro League team paruk - Chhinga Veng Spikers, TNT, Tuichangral, Durtlang North, Khawbel leh Sihphir te an inel a, an inkhelh kual vek hnuah a sang paliten semifinal khelin, chumi hnuah final khelh chhunzawm a ni.

Hmeichhe inelna huangah team pathum an inlan, nomawi inchuhna inkhelah Kolasib chuan Luangmual chu 3-1 (21-25, 25-21, 25-20, 25-12) a hnehin an champion ve bawk.