MPL12 Qualifier Vawiin aṭangin MPL khel tur zawnna

Mizoram Premier League khel tur zawnna MPL12 Qualifier chu vawiin aṭangin khelh ṭan a ni dawn a, Aizawl DFA aiawh pahnih Kanan FC leh Ramhlun North FC ten vawiin chawhnu dar 2:30 hian RG Stadium, Mualpuiah an inkhel dawn.

Kanan hian Aizawl DFA First Division Phase II-ah Ramhlun North hi 3-0 in sawp mah se qualifier erawhin boruak hran a nei ang. First Division-a best player Joseph Lalṭhafela'n season ṭantirhah MPL a khelh hman avangin qualifier a khel thei dawn lo a, Kanan FC tan channa nasa tak a ni thei ang.

Qualifier-ah hian Aizawl FC DFA club pahnih bakah Lawngtlai club MLS FC te an inel dawn. Vawi khat ṭheuh an inkhel kual hnua a sang berin MPL12 an khel ang a, pahnihnain Chawnpui FC nen playoff an khel thung dawn. Playoff hi double leg-a khelh tur a ni dawn a, November 4, Thawhṭanni leh November 6, Nilaini-ah khelh a ni thung ang.