Kartawp ISL-ah goal a sur

Kartawp Indian Super League inkhelah goal a sur a, beisei loh result a thleng nual - NorthEast United chuan an intawn hmaa vawi khat chiah la tlawm Jamshedpur FC chu 5-0 ngawtin an lo sawp a, Hyderabad pawhin tun season-a an chak vawi khatnaah Mohammedan SC chu 4-0 in an sawp!

Zirtawpni zan khan tun season-a tlawm la nei lo Bengaluru chuan an chet ṭhat an chhunzawm zel a, an mikhualna ramah Kerala Blasters chu 3-1 in an hneh bawk - tu umphak rual lohin table chung ber an luah chhunzawm.

Highlander an sang

Jamshedpur-in NorthEast United an hmachhawn hmain league match ngaah vawi khat chiah tlawm an nei a, Khalid Jamil-a hoin season duhawm tak an hmang. Mahse, Guwahati khawpuia an lenluh meuh chuan si nga an phur a, an khung ve miah lo!

Highlander-in an coach hlui Khalid-a team lakah zahngaihna an lantir lo a, Alaeddine Ajaraie leh Parthib Gogoi ten goal hnih ve ve khungin, Macarton Nickson chuan goal khat a thawh bawk - NorthEast United tan ISL-a an chak chian ber record a ni a, match khatah heti zata tam goal an la khung ngai lo bawk.

Hyderabad an harh

Inrinni zana Mohammedan an hmachhawn hmain Hyderabad an la chak lo a, match li aṭangin point khat chiah an nei. Mahse, I League champion an hmachhawn meuh chuan goal li an khung a, 4-0 ngawtin Thangboi Singto-a nauten hnehna an chang. Hyderabad tan Allan Paulista chuan goal hnih khungin Stefan Sapic leh Parag Shrivas ten goal khat ve ve an thawh bawk.

Kolkata club tan Zodingliana Tochhawng, Vanlalzuidika Chhakchhuak leh Lalremsanga Fanai ten inkhel bul an ṭan a, Hyderabad tan Lalbiakhlua Jongte chuan si ban nghakin, Isaac Vanmalsawma leh Ramhlunchhunga ten inkhel bul an ṭan bawk a, Lalchhanhima Sailo chu bench aṭanga luhtir a ni.

Saipui kal lai

Bengaluru-in tun season ISL-ah match ruk an khel tawh a, tlawm an la nei lo - vawi nga an chak a, vawi khat an draw. Fans sing tel puihna nen Blasters-in Bengaluru kal tluang lai hi lo thlak danglam tum mah se an hlawhtling lo a, an tlawm.

Bengaluru tana Jorge Pereyra Diaz goal hmahruai chu Blasters hian first half hun pek belhah Jesus Jimenez-a penalty hmangin an chhanglet a, mahse, Edgar Mendez chuan Bengaluru tan goal hnih khung ve lehin, Bangalore club an chak - Kerala tan Freddy Lallawmawma chu bench aṭangin a lut a, Bengaluru tan Lalremtluanga Fanai chu bench aṭangin a lut bawk.