Dortmund an tlawm; champion lai Leverkusen an chelh!
Bayern Munich ṭantuten chanchin lawmawm hriat tur an nei - Bundesliga-a an elpui ber, Borussia Dortmund leh champion lai Bayer Leverkusen te kartawp inkhelah an chak zo lo a, nizan khan Bayern hi inlan ve thungin an result kan hre hman lo.
Borussia Dortmund-in Augsburg lakah goal an khung hma a, Donyell Malen chuan minute lina lekah hmahruaina goal a khung. Mahse, mualneitu Augsburg-in tlawm bik an duh lo a, Alexis Claude-Maurice goal hnih hmanga chhangletin, 2-1 in an chak daih.
Leverkusen hian Inrinni khan Werder Bremen an lenchilh a, Victor Boniface leh Felix Agu (own goal) hmangin vawi hnih ngawt hma hruai mah se, Bremen hian Marvin Ducksch leh Romano Schmid hmanga chhangletin, 2-2 in inkhel a tawp.
Inrinni inkhel danga RB Leipzig chuan 3-1 a SC Freiburg hnehin, Bundesliga table chung ber an luah a, nizana VfL Bochum lenchilhtu Bayern Munich-in hnehna an chan chuan Leipzig nen an point hmuh zat a inang chiah ang.
Bei tidawng Dortmund!
Dortmund-in season hmasaah Champions League final an khel a, mahse, league lamah pangana ni chunga season an khar hram avangin coach Edin Terzic nen an inṭhen - beiseina sang tak nen player hlui Nuri Sahin chu coach atan an ruat a, an beisei ang result erawh a pe thei rih lo.
German club hian an league match hmasa pathumah tlawm nei lo mah se, a hnu match nga an khelhah vawi hnih chiah an chak a, vawi thum an tlawm - Augsburg laka an tlawm hma hian Real Madrid chuan Champions League-ah 5-2 in an sawp bawk.
Minute lina lekah Dortmund hian Malen hmangin goal hmahruai an khung a, mahse, an hlim chhung a rei lo. Tun season-a an chetsual fona tlarhnung lamah bawk an chesual a, Alexis Claude-Maurice chuan minute 25-na leh 50-naah goal a khung - a goal khung hi Dortmund tihsual aṭanga lut ve ve a ni.
Mikhual team Dortmund tan Marcel Sabitzer leh Jamie Gittens ten goal khungna remchang dang nei mah se, an chhawr lo a, Augsburg wing back Marius Wolf-a'n a club hlui lakah goal a khung thei bik lo - hun pek belhah Dortmund tan thil duhawm lo dang a thlen belh a, kum 18 mi Almugera Kabar chu a club tana a match hmasa berah a yellow card pahnihna a hmuh avangin hnawhchhuah a ni zui.
Leverkusen an chelh
Season hmasa lawkah tlawm nei loin Bayer Leverkusen an champion a, club lian tam tak rim karah coach Xabi Alonso leh player langsar tam zawk cham zui mah se, Leverkusen an fuh chhunzawm hleithei lo - an league match hnuhnung palia a vawi thum nan an khingpui an inhnehtawkpui leh ta.
Leverkusen hian minute 30-naah striker chhuanvawr Boniface hmangin goal hmahruai an khung a, kar hmasa lawka taxi accident-a tel Boniface-a'n a 'fit' leh tawh tih a pholang - Boniface-a goal khung hma hian Bremen hian goal khung theihna chance vawi thum an nei a, an chhawr lo vek!
Striker Marvin Ducksch chuan minute 19 chhungin chance duhawm vawi thum ngawt a nei. Mahse, Leverkusen keeperLukas Hradecky-a'n ṭha zetin a dansak vek a, an chance neih an chhawr loh hnuah Boniface-a'n a hrem zui.
Ducksch hian minute 74-naah goal a khung ta nge nge a, a hnu lawkah Leverkusen hian Felix Agu-a own goal hmangin hma an hruai nawn. Mahse, Bremen tan Romano Schmid chuan minute 90-naah penalty box pawn chiah aṭangin kawh pawtin a thlawh lut a, 2-2 in inkhel a tawp.