James hoin Lakers an kal zel

LeBron James leh Anthony Davis te pahnih point neih zat chu 63 ngawt mai a ni a, an khelhna Los Angeles Lakers chu Sacramento Kings lakah 131-127 in an chakpui.

Nimin zing Crypto.com Arena-a NBA regular season inkhelah Lakers an che ṭha hle a, point 15 ngawta san fal lai pawh an nei. Kings lamin bei letin 94-87 in an hnaih leh hman.

Mahse, quarter hnuhnung berah James leh Davis ten point 30 an nei a, tun season match an khelh hmasa pathumah an chak vek - October 29, Thawhlehni zingah Phoenix Suns nen an inhmachhawn leh ang.

Davis-a'n mimalin point 31 a nei tling a, legend Kobe Bryant sulhnu a zui - Bryant hian 2005-06 season khan an match hmasa pathumah point 30 a nei tling vek, ani hnuah chuan Davis hi Lakers tana hetiang ti leh thei hmasa a ni ta chiah.

An thiampuipa James-a'n point 32 a neih bakah rebound vawi 14 lain assist ṭum 10 a nei bawk, triple double a nei tihna a ni. Kum 39 mi a nih tawh hnuah pawh Lakers tana mi ṭangkai leh innghahna a la ni chhunzawm zel.

Inkhel dangah Kevin Durant pawhin sulhnu ṭha a hnutchhiah, Durant hian Phoenix Suns chu Dallas Mavericks lakah 114-102 in a chakpui. An chak theih nan point 31 neiin a thawh hlawk hle.

Basketball inelna ngaihhlut NBA huangah Durant hian point 29,010 a nei tling ta chiah. NBA-ah hian player pariat chiahin point 29,000 an la nei tling, an zingah Durant hian a hming a chhukai ta chiah a ni.